Qafar Cəfərli, AYB Lənkəran Bölməsinin sədri, yazıçı, dramaturq. “Ədəbiyyat və incəsənət” üçün
7 sentyabr 2024-cü il tarixdə AYB Lənkəran Bölməsində yeni çapdan çıxan "Cənub inciləri" antologiyasının təqdimatı keçirildi.
Təqdimatda Cəlilabad, Masallı, Yardımlı, Astara, Lerik və Lənkərandan olan yazarlar, ziyalılar, oxucular iştirak etdi.
Tədbiri giriş sözü ilə bölmənin sədri, yazıçı, dramaturq Qafar Cəfərli açdı. O, tədbir iştirakçılarını salamladı, kitabda çap olunan bütün müəllifləri, bölgənin ədəbi mühitini, ziyalıları və oxucuları təbrik etdi. Bildirdi ki, fəaliyyətdə olduğu 46 il ərzində Bölmədə 2004 və 2015-ciillərdə “Ömür yarpaqları” adl iki antologiya nəşr olunmuş, təxminən on illik fasilədən sonra “Cənub inciləri” işıq üzü görmüşdür. Antologiyada əsasən bölgənin altı rayonunda yaşayan qələm adamlarının, daha çox isə gənclərin əsərləri yer almışdir.
Qafar Cəfərli çıxışında 87 müəllifin yer aldığı, bütün ədəbi növləri əhatə edən antologiyada əsərlərin əlifba sırası ilə düzüldüyünü, yazıların peşəkar korrektə və redaktə olunduqdan sonra kitaba daxil edildiyini, bəzi xırda qusurlarına baxmayaraq antologiyanın nəşrinin bütün hallarda bölgənin ədəbi həyatında bir uğur və hadisə olduyğunu xüsusilə vurğuladı.
Məclisi idarə edən Qafar Cəfərli sözü tədbir iştirakçılarına verdi. Yardımlı rayonundan şair İqbal Nəhmət, Cəlilabad rayonunundan filologiya elmləri üzrə fəlsəfə doktoru, şair və yazıçı Bilal Alarlı, Masallı rayonundan şairlər Allahverdi Bayrami və Camal Lələzuə, Astara rayonundan şairlər Firəngiz Ümid və Nəriman Azəri, Qaradağ rayonundan gəlmiş şair Qorxmaz Kadusi, Lənkəran yazarlarından: "Aşkarlıq" qəzetinin baş redaktoru, yazıçı Hacı Etibar Əhədov, yazıçı-publisist Səyavuş Süleymanlı, "Zərban"TV-nin təsisçisi və baş redaktoru, yazıçı Hafiz Mirzə, həkim-yazıçı Eldar Tahirov, şairlərdən Bəxtyar Əliyar, Tofiq Həsənli və Əyyub Türkay, bölmənin sabiq sədri, mərhum şair İltifat Salehin qızı Afaq İltifatqızı və başqaları çıxış edərək antalogiyanın nəşri münasibətilə müəllifləri təbrik etdilər. Hazırlanmasında birbaşa təşəbbüsçü və bütün ağırlığını boynuna götürən, nəticədə son dərəcə nəfis tərtibatda, gözəl dizaynda nəşr olunan kitaba görə bölmə sədri, kitabın tərtibçisi və baş redaktoru Qafar Cəfərliyə, kitabın redaktorlarına və bu işdə əməyi olan hər kəsə təşəkkürlərini bildirdilər.
İqbal Nəhmətin, Bəxtiyar Əliyarın və Nəriman Azərinin məclisdə oxuduğu şeirlər tədbir iştirakçıları tərəfindən maraqla qarşılandı.
Sonda Qafar Cəfərli çıxış edərək söylənilən irad və təkliflərə münasibət bildirdi, tədbir iştirakçılarını maraqlandıran bütün məsələlərə aydınlıq gətirdi. O, tədbir iştirakçılarına, çıxış edənlərə söylənən xoş sözlərə görə, xüsusən kitaba ön söz yazan AMEA-nın ədəbi tənqid şöbəsinin müdiri, filologiya elmləri doktoru Vaqif Yisifliyə, kitabı nəfis şəkildə çap edən “Bakı mətbəəsi” ASC-nin rəhbəri, Azərbaycan və Rusiya Yazıçılar Birliklərinin üzvü, yazıçı, tanınmış alim və naşir Şəddat Cəfərova və tədbiri kameranın yaddaşına köçürən “Zərban” TV-nin təsisçisi Hafiz Mirzəyə öz adından və bölgə yazarları adından minnətdarlığını bildirərək tədbiri yekunlaşdırdı.
Sonda xatirə şəkilləri çəkildi.
“Ədəbiyyat və incəsənət”
(09.09.2024)
