Əməkdar rəssam, Azərbaycan Rəssamlıq Akademiyasının dosenti Əsmər Nərimanbəyova bu yaxınlarda Qazaxıstanda keçirilmiş “Botay – Böyük səhranın mədəniyyəti” II Beynəlxalq Simpoziumda iştirak edib.

AzərTAC xəbər verir ki, simpoziumda dünyanın doqquz ölkəsindən olan 20 rəssam iştirak edib. Rəssamlar regionun tarixi və mədəni irsi ilə tanış olub, yeniyetmələr üçün ustad dərsləri keçib, eləcə də "Botay" Respublika Dövlət Muzey-Qoruğunun və Ayırtau rayonunun Şalkar-İmantau kurort zonasının ərazisində plenerdə iştirak ediblər.

Əsmər Nərimanbəyova simpoziumda iştirakı ilə bağlı AZƏRTAC-a təəssüratlarını danışıb: “Bu çox maraqlı, dolğun tədbir idi. İlk həftə biz təbiətin qoynunda işləyirdik, plenerdə iştirak etməklə təəssürat toplayırdıq, təbiətin gözəlliyi ilə nəfəs alırdıq. İkinci həftə artıq Petropavlovskun özündə, emalatxanalarda işə davam edirdik. On beş gün ərzində mən hesabat sərgisi üçün 6 rəsm əsəri yaratdım. Eyni zamanda, biz uşaq evlərində ustad dərsləri keçdik. Bu çox gözəl, müsbət prosesdir. Uşaqlar rəsm əsərlərini bizimlə birlikdə yaradıblar. Uzun masalarda kağız rulonunu açaraq, birlikdə işləmək mənim ideyam idi. Sonra biz bu təcrübəni vidalaşmadan öncə son gün özümüz təkrar etdik— hazır iş kompozisiyasına elementlərimizi əlavə etdik”.

Simpozium çərçivəsində yüzdən çox rəsm əsəri yaradıldığını deyən rəssam əlavə edib: “Sərginin çox gözəl açılış mərasimi keçirilib, yaradıcılığımız tamaşaçıya təqdim olunub. Çox sayda müxtəlif üslub alınıb. Bu cür simpoziumlar — çox gözəl təşəbbüsdür, çünki dünyanın müxtəlif ölkələrindən olan rəssamlar bir məkanda görüşə, ünsiyyət qura, təcrübə mübadiləsi apara bilərlər. Bundan əvvəl mən Serbiyada olmuşam, orada da forumda iştirak etmişəm. Orada başqa bir mühit var idi, çünki dünyanın digər hissəsindən rəssamlar toplaşmışdı. Bu hər zaman çox maraqlıdır”.

“Ədəbiyyat və incəsənət”

(05.09.2023)