Cəfər Cabbarlı adına Respublika Gənclər Kitabxanasında "Müasir gəncliyi narkotik vasitələrə meyillilikdən qoruyaq" adlı müzakirə təşkil edilib.
Kitabxananın məlumatına görə, kitabxana direktoru Aslan Cəfərov müasir gəncliyin Azərbaycanın sabahı, gələcəyi olduğunu, eləcə də dövlətin, millətin, xalqın gələcəyinin sağlam və etibarlı gənclikdən asılı olduğunu bildirib. O, xalqımızın Ümummilli Lideri Heydər Əliyevin narkomanlığa, həmçinin narkotik vəsitələrin qanunsuz dövriyyəsinə qarşı mübarizəni ümumdövlət vəzifəsi elan etməsindən və Prezident İlham Əliyevin imzaladığı müvafiq Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə, eyni zamanda narkomanlığa qarşı mübarizəyə dair 2019-2024-cü illər üçün Dövlət Proqramı”nın icrası ilə əlaqədar təşkil edilən mədəni-kütləvi tədbirlərdən, sosial aksiyalardan və onların müstəsna əhəmiyyətindən danışıb. Müasir gəncliyi pis vərdişlərdən, narkotik vasitələrdən istifadədən çəkinməyə, sağlam həyat tərzinə, elmə, maarifə meyil etməyə çağırıb.
Kitabxananın elmi işlər üzrə direktor müavini Xalidə Musayeva bu gün bəşəriyyəti düşündürən, cəmiyyətin ciddi bəlasına çevrilən, insan cəmiyyətinin mənəvi və əxlaqi dəyərlərinə böyük zərbə vuran narkomaniyanın müasir dövrün ən ağrılı problemlərindən biri olduğunu söyləyib. O, gənc nəslin sağlam ruhda tərbiyəsinin dövlətin və cəmiyyətin əsas vəzifəsi olduğunu bildirərək, Respublika Gənclər Kitabxanasında bu mövzuda həyata keçirilən tədbirlər, layihələr, hazırlanan materiallar, eləcə də kitabxananın fondunda narkomaniya və onun faciəvi nəticələri mövzusunda qələmə alınan bədii ədəbiyyat nümunələri haqqında geniş məlumat verib.
Tədbirdə iştirak edən tələbələr narkomaniyaya səbəb olan amillər, onun acı fəsadları, bu bəladan xilas yolları və digər mövzularda çıxış ediblər. Narkomaniya ilə mübarizədə təbliğat-təşviqat aksiyalarının vacibliyi, ailə və çevrənin məsələyə məsuliyyətli yanaşmasının zəruriliyi kimi mövzular da müzakirə edilib.
Tədbirin sonunda kitabxanada açılan “Narkomaniya-dövrün bəlası” adlı ənənəvi kitab sərgisinə baxış keçirilib.
“Ədəbiyyat və incəsənət”
(10.03.2023)
