Şəfa Vəli, “Ədəbiyyat və incəsənət” portalının Şəki-Zaqatala təmsilçisi

Həftəsonu Şəki-Zaqatala Regional Mədəniyyət İdarəsinin təşkilatçılığı ilə Şəki şəhər Heydər Əliyev Mərkəzində "Yaşıl dünya naminə media həmrəyliyi" adlı konfrans-konsert keçirildi. Növbəti söhbətimiz bu haqdadır.

Konfrans başlamadan öncə ölkəmizin təbiətini və iqlimini əks etdirən "Yaşıl dünya naminə həmrəy olaq" adlı sərgiyə baxış oldu. Daha sonra konfrans öz işinə başladı. Konfransda media təmsilçiləri olaraq “İctimai TV” nın bölgə müxbiri Rasim İslamov, “Şəki Bələdiyyəsi” qəzetinin redaktoru Murad Nəbibəyov, Şəki şəhərində fəaliyyət göstərən “Kanal S” televizyasının xəbərlər departamentinin müdiri Gülgəz Mustafayeva, “Şhaki Media”nın təsisçisi İbrahim Yunusov, “İpəkçi” qəzetinin təsisçisi Aydın Salisoğlu iştirak edirdilər.

Konfransı giriş sözü ilə açan Şəki-Zaqatala RMİ-nin rəisi vəzifəsini icra edən Nargilə Qafarova 2024 -cü ilin ölkəmizdə “Yaşıl dünya naminə həmrəylik ili” elan olunmasının önəmini qeyd edərək, Azərbaycanın dünyada iqlim dəyişmələrinin fəsadlarına qarşı mübarizəyə öz töhfəsini verməsindən bəhs etdi. Daha sonra çıxış edən Şəki-Zaqatala RMİ-nin media üzrə aparıcı məsləhətçisi Vüsal Həsənov medianın əhatə dairəsinin yalnız informasiya ötürücülüyü funksiyası daşımaq olmayıb, eyni zamanda ekoloji tarazlığın qorunması istiqamətində doğru informasiya ilə təmin edilməsində vacib rolu olduğunu vurğuladı. Tədbirə dəvət edilən media nümayəndələri də “Yaşıl dünya naminə həmrəylik ili” çərçivəsində görülən işlərdən, COP29 konfransının ölkəmizdə keçirilməsinin önəmindən, bu istiqamətdə medianın funksionallığından və medianın üzərinə düşən öhdəliklərdən danışdılar. Konsert proqramı ilə davam edən tədbirdə COP29 və Azərbaycan təbiətini özündə əks etdirən videoçarx nümayiş olundu, Eldar Rəcəbovun rəhbərlik etdiyi Şəki şəhər Uşaq İncəsənət məktəbinin "Zəfər " ansamblının müşayəti ilə Fərqanə Salamova "Ölkəm", Hüsniyyə Hacıyeva-Fərqanə Salamova dueti  "Azərbaycan", Anar Xan "Daglar", Sərxan Hüseynov "Mavidir" və Namiq Aslanın ifasında "Köçür durna qatarı" milli müsiqi nümunələri səsləndirildi, "İncəlik rəqsi", "Azərbaycan suitası" kimi rəqs nümunələri ifa olundu.

Konsertdə Şəki şəhər İcra Hakimiyyətinin, YAP Şəki şəhər təşkilatının rəhbərliyi, Şəki şəhərində fəaliyyət göstərən dövlət qurumlarının nümayəndələri, mədəniyyət və təhsil işçiləri, ictimaiyyət nümayəndələri iştirak edirdilər. Tədbirin sonunda media nümayəndələri Şəki-Zaqatala RMİ tərəfindən səmərəli fəaliyyətlərinə görə təltif edildilər və hədiyyələrə layiq görüldülər.

“Ədəbiyyat və incəsənət”

(25.11.2024)