Super User
GƏNC İSTEDADLAR – El Roman Əlizadə
Gənclik ömrün ən gözəl çağıdır. Gəncliyin poeziyası da təbii ki, gözəl olur. Gənc istedadlar rubrikasında “Ədəbiyyat və incəsənət” portalı sizlərə gənc və həddən artıq istedadlı şair Elroman Əlizadənin şeirlərini təqdim edir.
Belə deyir El Roman:
Qızarmış gözlərim də
adını çəkə bilmir,
çünki səni unutdu.
Üç dəfə qapımı döy,
dördüncüdə açmasam,
bil ki, səni unutdum...
Bu gün 3 şeir, bir o qədər də sabah.
“Adam bilmir”
Zaman daha insafsızdı,
Zaman ölüm-itim bilmir.
Evinizi, qapınızı
Küçənizin iti bilmir.
Hardan bilsin yetim, bilmir.
Göyün yeddi qatı var? Var!
Göyləri məskən bilirsən.
Ölümün saatı var? Var!
Mən bilirəm, sən bilirsən,
Əzrayıl saatı bilmir.
Daha mən də qocalmışam.
Daha atam da qocalıb,
Siqareti ata bilmir.
Daha anam da qocalıb
Corabımın tayı itir,
Ha axtarır, tapa bilmir.
Səndən sonra təkliyimi,
Mənim nələr çəkdiyimi
Sən bilirsən, Allah bilir,
anam bilir, atam bilmir...
Külək əsir həzin-həzin,
Qulağımda sənin səsin.
Neyləsin, qızım, neyləsin,
Adam bilmir, adam bilmir...
“Altıncı hiss”
Bağışlama gedəni,
çünki ən böyük haqqı
nahaqla dəyişmisən.
Səni kitab edəni
sənə xitab edənə
nə haqla dəyişmisən?
Təkliyə öyrəşmirəm,
təsəlli verirəm ki,
yar atmış ola bilməz.
Sən ayrısan, mən ayrı,
ikimizi bir Tanrı
yaratmış ola bilməz.
Sən ki gündüz getmisən,
məcburam ki, gündüzə
gecə deyim, əzizim.
Səni alana baxıb
“səni verənə şükür"
necə deyim, əzizim?
Bu sevda nə sevdadır,
əvəzimə kor olub
məni yenə görməzlər.
Saçın ucun da hörsəm,
gülü sulu da dərsəm,
səni mənə verməzlər.
Altıncı hissim susub,
saat beşdə gedən qız,
dörd fəsildir itmisən.
Üç illik məhəbbəti
iki gündə unudub
bir dəfəlik getmisən...
“Ağac”
İncimədi kağızım,
indicə bir qələmlə
incidəni yazıram.
Həyatdı da əzizim,
bir vaxt sənə yazırdım,
indi səni yazıram.
Həsrət bükdü belimi,
barı, yanımda qalsan,
cəhənnəm, dik olardım.
O qədər ağlamışdım,
kirpiyim oruc olsa,
cəhənnəmlik olardım.
Alnımda bir ləkə var,
səbəbi nə, sirri nə,
bəlkə bir tikə qaldım?
Alın yazım sən idin,
tanrı səni pozanda
yerində ləkə qaldı.
Ağaca səni yazdım,
yağış yerə düşdükcə
göyə buxarı qalxdı.
Hər ağac böyüdükcə
ağacdakı adın da
bir az yuxarı qalxdı.
Qızarmış gözlərim də
adını çəkə bilmir,
çünki səni unutdu.
Üç dəfə qapımı döy,
dördüncüdə açmasam,
bil ki, səni unutdum...
“Ədəbiyyat və incəsənət”
(19.10.2021)
AZAL-dan xüsusi təklif: Avropanın 8 şəhərinə unudulmaz səyahət
“Azərbaycan Hava Yolları” Bakıdan Avropanın səkkiz şəhərinə və əks istiqamətdə xüsusi təklif təqdim edir.
AZAL-ın mediaya açıqlamasında bildirilir ki, aviaşirkətin qeyd edilən istiqamətləri - Praqa, Paris, London, Vyana, Berlin, Barselona, Cenevrə və Milan üzrə aviabiletlərdə güzəştli qiymətlərdən yararlanmaq mümkündür. Təklif 17-26 oktyabr tarixlərində əldə edilmiş biletlərə və 2024-cü ilin 15 yanvar – 11 mart tarixləri arasında yerinə yetirilən uçuşlara şamil edilir.
Aviabiletlərin dəyərinə hava limanı rüsumları daxildir:
Bakı-Vyana-Bakı, Bakı-Praqa-Bakı, Bakı-Berlin-Bakı, Bakı-Cenevrə-Bakı biletləri 299 avrodan başlayır;
Bakı-Paris-Bakı, Bakı-London-Bakı, Bakı-Barselona-Bakı, Bakı-Milan-Bakı biletlərini 399 avrodan başlayan qiymətlərlə əldə edə bilərsiniz.
Güzəştli aviabiletləri aviaşirkətin www.azal.az saytından, həmçinin “Azərbaycan Hava Yolları”nın kassalarından və akkreditə olunmuş agentliklərindən əldə etmək olar.
“Ədəbiyyat və incəsənət”
(19.10.2023)
Bu gün İtalyan pianoçu Lorenso Banyati Muğam Mərkəzinin səhnəsində çıxış edəcək
Bu gün İstedadlı italyan pianoçu Lorenso Banyati Bakı tamaşaçıları qarşısında çıxış edəcək. “Suda əks olunanlar” konserti Beynəlxalq Muğam Mərkəzində keçiriləcək.
“Ədəbiyyat və incəsənət” portalı iTicet-ə istinadən xəbər verir ki, maraqlı proqramda Ferens List, Moris Ravel, Klod Debüssi və digərlərinin əsərləri səsləndiriləcək.
Lorenso Banyati – dünya fortepiano səhnəsinin parlaq yüksələn ulduzudur. O, 1998-ci ildə Milanda istedadlı musiqiçilər ailəsində dünyaya gəlib. Artıq 4 yaşında fortepianoya olan həvəsi aşkar olunub və 7 yaşında Benedetto Marçello adına nüfuzlu Venesiya Konservatoriyasının tələbəsi kimi ilk konsertini verib. Gənc pianoçu konservatoriyanı 17 yaşında əla qiymətlərlə bitirərək, təhsilini Qnesinlər adına Rusiya Musiqi Akademiyasında davam etdirib. Hazırda Lorenso ustalığını maestro Eliso Virsaladzenin rəhbərliyi altında təkmilləşdirir. Onun çıxışları virtuoz texnikanın və dərin emosionallığın simbiozudur.
Anton Rubinşteyn adına müsabiqə və bir çox başqa beynəlxalq müsabiqələrin qalibi Lorenso Banyati “Karneqi Holl” (Nyu-York) və La Feniçe Teatrı (Venesiya) da daxil olmaqla, mötəbər dünya səhnələrində solo konsertlərlə çıxış edir. Tanınmış musiqiçi bir neçə nüfuzlu müsabiqələrin münsiflər heyətinin üzvüdür.
“Ədəbiyyat və incəsənət”
(19.10.2023)
Redaksiyanın poçtundan: Cəfər Atayevin əruzu
“Ədəbiyyat və incəsənət” portalının poçtuna oxucumuz Cəfər Atayevdən gəlmiş şeiri təqdim edirik.
Qəlb ilə sevən kəslər uduzmaqlara məhkumdur.
Eşqimsə ibadətdir, müqəddəslərə məlumdur.
Saxla, qoru o ruhunu, o dünyaca məsumdur.
Çün, fərqli bətnlərdən əkizlər hələ məhrumdur.
Mən car ilə çəksəm ahımı dağlar əyər başın.
Bir gah edib əssəm, küləyim parələyər daşı.
Zənn eyləmə, gözlər yolunda saxlayar təlaşı.
Hərdən əsərək kipriyim də yağdırar yağışı.
Boylan gecə yarı hələ ulduzlara et diqqət .
Yalnız olanı süzsən sən əgər, orda mənəm əlbət.
Sönmüştək uzaqlarda günəş gözləyən o bədbəxt
Bir gecə günəş çıxsa əgər yox olar bu həsrət...
“Ədəbiyyat və incəsənət”
(19.10.2023)
Bu dəfə yaradıcı sənayelərin və innovasiyaların mədəniyyət sahəsində inkişafından danışılacaq
“Ədəbiyyat və incəsənət” portalının Sual-cavab rubrikasında bu gün I Türk Dünyası Mədəniyyət Forumu çərçivəsində keçirilən yaradıcı sənayelərin və innovasiyaların mədəniyyət sahəsində inkişafı ilə bağlı panel barədə sualı cavablandıracğıq. Rubrikanı Könül aparır.
SUAL:
Hörmətli “Ədəbiyyat və incəsənət”!
I Türk Dünyası Mədəniyyət Forumu çərçivəsində yaradıcı sənayelərin və innovasiyaların mədəniyyət sahəsində inkişafı ilə bağlı olduqca maraqlı panel keçirildi. Panellə bağlı geniş bilgi verməyinizi xahiş edirəm.
Hörmətlə: Tubu İsmayılova.
CAVAB:
I Türk Dünyası Mədəniyyət Forumu çərçivəsində yaradıcı sənayelərin və innovasiyaların mədəniyyət sahəsində inkişafı ilə bağlı panel keçirilib.
Paneldə fərqli ölkələrdən nümayəndələr, yaradıcı sənayelərin nümayəndələri, assosiasiyaların üzvləri, rəhbərləri, həmçinin özəl sektorun nümayəndələri iştirak ediblər.
Mədəniyyət Nazirliyinin Yaradıcı sənayelər və rəqəmsal inkişaf şöbəsinin müdiri Rəşad Əzizov “Mədəniyyət və Yaradıcı sənayelər sahəsində türk dövlətlərinin əməkdaşlıq perspektivləri” mövzusunda keçirilən panel sessiyası ilə bağlı məlumatları bölüşüb.
O bildirib ki, yaradıcı sənayelərin inkişafı olduqca vacib bir istiqamətdir. Hazırda mədəniyyətin təbliğatı, inkişafı barədə sessiyada təcrübə mübadiləsi aparılıb, maraqlı layihələr barəsində məlumatlar paylaşılıb. Artıq Şuşada keçirilmiş I Türk Dünyası Mədəniyyət Forumu yeni layihələrə, təşəbbüslərə start verir.
Rəşad Əzizov qeyd edib ki, eyni zamanda, innovasiyalara da xüsusi önəm verilir. İndiki dövrdə bu texnologiyaların tətbiqi, xüsusi olaraq süni zəkanın tətbiqi bütün sahələrdəki kimi, mədəniyyət və yaradıcılıq sahəsində də öz yerini tutur.
“Bu sahədə əməkdaşlıq artırılmalıdır və Mədəniyyət Nazirliyi hazırda bu proseslərə xüsusi diqqət yetirir. Qısa müddətdə nəinki ölkədaxili, eyni zamanda, digər türkdilli ölkələrlə birgə müvafiq layihələrin həyata keçirilməsi nəzərdə tutulub", - deyə şöbə müdiri qeyd edib.
“Ədəbiyyat və incəsənət”
(19.10.2023)
Sadiq Qarayevin 44 günlük müharibədən bəhs edən yeni romanı işıq üzü görəcək
“Ədəbiyyat və incəsənət” portalı Sadiq Qarayevin yeni yazdığı və yaxın günlərdə işıq üzü görəcək romanından bəhs edəcək.
Ondan başlayaq ki, tamam başqa sahənin adamı olsa da ədəbiyyat sahəsində də kifayət qədər uğurlu iş ortaya qoymağı bacarıb. Onun son romanı - “N” saylı qəhrəmanlıq” bu cəhətdən xarakterikdir. Mövzu olduqca aktual mövzudur – 44 günlük müharibə!
Azərbaycanın zəfəri təbii ki, bədii əsərlərdə, digər mədəniyyət artefaktlarında kifayət qədər tərənnüm olunmlıdır. Müharibə mövzusu günümüzdə bir trendə çevrilməlidir. Ancaq əksər yazarlarımız bu ağır yükün altına girməkdən çəkinirlər, belə məqamda da Sadiq Qarayevin ortaya “N” saylı qəhrəmanlığ”ı çıxarması əsl alqışa layiqdir.
Roman mürəkkəb quruluşlu romandır, özündə bədiiliklə sənədliliyi bir araya gətirir. Romanda müəllif 44 günlük müharibədə ön və arxa cəbhəni, beynəlxalq arenada vəziyyəti, xalq-dövlət-ordu-Ali Baş Komandan birliyinin gücü olan “Dəmir Yumruğ”u və “N sayda qəhrəmanları və “N” saylı qəhrəmanlıqları” işıqlandırmışdır.
“Müharibə tumurcuqları” adlanan I fəsildə 44 günlük müharibəyə qədərki uzun yoldan: müharibənin səbəbləri, ermənilərin zaman-zaman xalqımızın başına gətirdikləri vəhşiliklər, soyqırımlar, torpaqlarımızın işğalı, I Qarabağ müharibəsində, Aprel döyüşlərində, Tovuz döyüşlərində əsgər və zabitlərimizin qəhrəmanlığı, Azərbaycan xalqının “Şəhidlik məktəbi”ndən bəhs edilmişdir.
II fəsildə 44 günlük müharibəyə hazırlıq, döyüşün planlamaları, başlanması, 2-ci ordu korpusunun timsalında 30 il ərzində möhkəmlənmiş “keçilməz Ohanyan xəttinin” rəşadətli Azərbaycan Silahlı Qüvvələrinin qəhrəman əsgər və zabitləri tərəfindən yarılması, kənd və şəhərlərimizin işğaldan azad olunmasından bəhs edilmişdir. Onlarla şəhid və qazinin döyüş yolu, göstərdikləri qəhrəmanlıqları, şücaətləri əsasən sənədli, real faktlar əsasında təsvir edilmişdir.
III fəsildə Şuşanın azad olunması, möhtəşəm tarixi qələbə sayəsində 30 il davam edən işğalın sona çatması, Cıdır düzündə “Sərxoş qarğa rəqsiərinin” “Xarıbülbül” festivalıyla əvəz olunması fonunda mövcudluğun dəyişilməsi təsvir olunmuşdur: Azərbaycan şəhidlik, qəhrəmanlıq məktəbi 200 illik ermənilik faşizmi və havadarları üzərində tarixi, həlledici qələbə çalır. Ermənilik ideyaları yoxluğa, keçmişə səpələnir.
Mən Sadiq Qarayevə belə ağır bir mövzuda roman yazmaq cəsarətinə görə minnətdarlıq bildirirəm. Təbii ki, 44 günlük müharibə mövzulu romanlar bundan sonra daha çox yazılacaq, xüsusən tanınmış nasirlərimiz ortaya sanballı işlər çıxara biləcəklər.
Bu roman isə ilk qaranquşlardan biri olduğu üçün təqdirəlayiqdir.
“Ədəbiyyat və incəsənət”
(19.10.2023)
Şəhriyar del Gerani evlənir
Gənc və kifayət qədər oxucusu olan şair Şəhriyar del Gerani evlənir. Oktyabrın 21-də onun toyudur. Gələcək həyat yoldaşının adı Leyla xanımdır.
Toy məclisi Şəhriyarın doğma İmişli rayonunda, “Kral” şadlıq sarayında baş tutacaq.
Bu barədə “Ədəbiyyat və incəsənət” portalı şairin özünə istinadən xəbər verir.
“Ədəbiyyat və incəsənət”
(19.10.2023)
SİZ BİLİRDİNİZMİ? rubrikasında yazıçı Əlibala Hacızadə barədə həqiqət
“Ədəbiyyat və incəsənət”in Siz bilirdinizmi? rubrikasında bu gün bir zamanların ən çox kitabı satılan yazıçısı Əlibala Hacızadə barədə bir fakt açıqlanacaq. Söhbət ondan gedir ki, “İtkin gəlin” trilogiyasını yazan tanınmış yazıçı həm də gözəl şeirlər yazırmış.
Onun şeirıərindən birini - “Yandı məktublarım”ı diqqətinizə çatdırırıq.
Yandı məktublarım...Sən yandırdın, sən,
Bilmədim bu səndə nə həvəs idi?
Yaralı könlümə yaralar vurdun,
Mənə əzabların, gülüm, bəs idi.
Yandı ürəyimin səsi, fəryadı,
Gözümdən sel-sular axıb çağladı.
Ömürümün sütunu qopub laxladı,
Mən sonra anladım o nə səs idi.
Ağladım, dözmədim göz yaşına mən,
Səni bağışladım candan ürəkdən,
Peşəm yanmaq olub, özün bilirsən,
Taleyim əzəldən mənim nəhs idi.
“Ədəbiyyat və incəsənət”
(19.10.2023)
Dövlət Tərcümə Mərkəzi yeni nəşri təqdim etdi: Selincerin “Seçilmiş əsərləri”ni
Dövlət Tərcümə Mərkəzinin 150 cildlik “Dünya ədəbiyyatı inciləri” (ADTM) seriyasından maraqlı kitablar nəşr etməsi barədə sizləri bilgiləndirmişdik.
Budur, növbəti nəşr – dünyaşöhrətli Amerika yazıçısı Cerom Devid Selincerin “Seçilmiş əsərləri” kitabı işıq üzü görüb.
Tərcümə Mərkəzindən verilən məlumata görə, yazıçının “Yalnız özümçün yazıram...” sərlövhəli müsahibəsi ilə başlayan kitaba “Çovdarlıqda uçurumdan qoruyan” romanı, “Qarşılıqlı razılaşma”, “Eddi ilә görüş”, “Yeniyetmәlәr”, “Eleyn”, “Çәllәkdә siyәnәklәr”, “Yad adam”, “Lәnәtә gәlmiş qırx birinci il”, “Domye-Smitin mavi mövsümü”, “Teddi” kimi məşhur hekayələri və qızı Marqaret Selincerin atası haqqında yazdığı “Xәyallarda uçurumdan qoruyan” memuarı daxil edilib.
Əsərlərin Azərbaycan dilinə tərcümə müəllifləri – tanınmış bədii tərcümə ustaları Tehran Vәliyev, Nəriman Əbdülrəhmanlı və Rәbiqә Nazimqızıdır.
Kitabı yaxın günlərdə “Libraff”, “Kitabevim.az”, “Akademkitab”, “Akademiya” kitab evi, “Baku Book Centre”, “Çıraq” kitab evi, Prezident Kitabxanası, Azərbaycan Dillər Universitetinin satış köşkü kitab evlərindən və mağazalarından əldə etmək olar.
“Ədəbiyyat və incəsənət”
(19.10.2023)
BİR ŞAİR BİR ŞEİRdə Elçin Mirzəbəylidən “Çıxım gedim, vaxtdı daha”
Xatirələr güllələnib
Son dəfə keçdiyin yerdə.
Təzə dərdlər pöhrələnib
Kəsdiyin, biçdiyin yerdən.
*
Ağrı kəsir şaxta kimi
Hər zərrəmdə buzu qalıb.
Qəlbim Urmu gölüdü ey...
Suyu uçub, duzu qalıb.
Ümidimin köşəsində
Bir cüt yetim quzu qalıb...
Günlər qəssab bıçağıdı,
Qəlbim qurbangahdı daha.
O aldığın hava ki, var –
Hava deyil, ahdı daha.
Çıxıb gedim bu dünyadan,
Çıxıb gedim...
Vaxtdı daha...
Kirpiyimdə gün qarsıyır,
Bəbəyimdən an süzülür.
Sapı qaçıb...
Ömrümüzün
İlməsindən can süzülür...
Dan yeridi dualarım
Hər sözündən qan süzülür...
Ləpir-ləpir izin qalıb
Ovcumda...
içdiyin yerdə.
*
Bu gərdişi fələk salıb?
Şeytan salıb?
Mələk salıb?
Arzuların lələk salıb
Başımdan uçduğun yerdə...
İçinə çək son kəlməni -
Alovu yandırsın səni...
Get, Allah qaldırsın səni
Gözümdən düşdüyün yerdən.
“Ədəbiyyat və incəsənət”
(19.10.2023)
