İmran Verdiyev, Azərbaycan Respublikasının Əməkdar müəllimi, “Ədəbiyyat və incəsənət” portalının Oğuz təmsilçisi
Yeni təqvim ilinin ilk günlərində oğuzlu şair Yusif Rzayevin yeni kitabı -"Vətən birdi, iki olmaz..." kitabı çapdan çıxmışdır.
AYB-nin üzvü, "Qafqaz-Media" İctimai Birliyinin "Cəsarətli qələm" medalına və "Xarı bülbül" diplomuna layiq görülmüş oğuzlu şair-tədqiqatçı Yusif Kamil oğlu Rzayev (Yusif Rza) ixtisasca filoloqdur, Azərbaycan Dövlət Pedaqoji Universitetini qurtarıb. Müxtəlif illərdə müəllim, jurnalist, dövlət qulluqçusu, elmi işçi vəzifələrində işləyib.
Onun şeirləri, elmi-publisistik məqalələri çoxsaylı qəzet və jurnallarda, almanaxlarda, Azərbaycanda və Türkiyədə dərc olunub. "Apar ürəyimi dağlara" (şeirlər), "Bura Oğuzdur" (məlumat-informasiya toplusu), "Hardan başlanır Vətən?" (şeirlər), “Oğuz Avestanın izləri" (elmi-etimoloji məqalələr toplusu), "Oğuz abidələri" (eImimonoqralya), "Dərə bilmədiyim gül" (şeirlər), "Oğuz və Qəbələ folkloru" (folklor antologiyası) və s. kitabların müəllifidir.
Yeni kitabda Oğuzun tanınmış şairi Yusif Rzanın həm şifahi xalq ədəbiyyatı, həm də klassik şeir formalarında (qoşma, gəraylı, təcnis, müxəmməs, qəzəl, rübai və s.) heca, əruz və sərbəst vəznlərdə yazdığı lirik, didaktik, fəlsəfi məzmunlu poetik nümunələri toplanıb. Bu şeirlərin çoxu müqəddəs Vətənə, qəhrəman şəhidlərimizə, Vətənin şanlı tarixinin və təbiət gözəlliklərinin təsvirinə, sülhə, dostluğa, haqqa-ədalətə həsr olunub.
Yaxın günlərdə kitabın təqdimat mərasiminin keçirilməsi nəzərdə tutulur.
“Ədəbiyyat və incəsənət”
(09.01.2025)
