İlhamə Məhəmmədqızı,
“Ədəbiyyat və incəsənət” portalının Sumqayıt təmsilçisi
5 İyun – Şairlər Günü münasibətilə Azərbaycan Yazıçılar Birliyinin Sumqayıt bölməsi və Sumqayıt Dövlət Rəsm Qalereyasının birgə təşkilatçılığı ilə görkəmli Azərbaycan şairi Mikayıl Müşfiqin xatirəsinə həsr olunmuş “Bir qara buludam uca göylərdə” adlı sərgi-tədbir keçirilib.
Sumqayıt Dövlət Rəsm Qalereyasında təşkil olunan tədbirdə əvvəlcə ənənəyə uyğun olaraq Xəzər dənizinə gül səpilərək nakam taleli şairin əziz xatirəsi ehtiramla yad edilib.
Tədbirin bədii hissəsində Milli Qəhrəman Polad Həşimovun adını daşıyan 28 nömrəli tam orta məktəbin şagirdləri Mikayıl Müşfiqin şeirlərini səsləndirib, həmçinin şairin sözlərinə bəstələnmiş mahnıları ifa ediblər. Daha sonra iştirakçılar Müşfiqin həyat və yaradıcılığına həsr olunmuş rəsm sərgisi ilə tanış olublar.
Tədbir çərçivəsində təşkil olunan dəyirmi masa ətrafında Sumqayıtın tanınmış qələm adamları çıxış edərək Mikayıl Müşfiqin Azərbaycan ədəbiyyatındakı yeri və zəngin yaradıcılığından söz açıblar. Filologiya elmləri doktoru, professor, Əməkdar mədəniyyət işçisi Rafiq Yusifoğlu, yazıçılar Cabir Ağaoğlu Albantürk, Lilpar Cəmşidqızı, Əliyar Mərdiyev və Fərhad Məhərrəmov şairlə bağlı fikirlərini və xatirələrini bölüşüblər.
Sonda Sumqayıt Dövlət Rəsm Qalereyasının müdiri Ellada Həsənova və Azərbaycan Yazıçılar Birliyinin Sumqayıt bölməsinin sədri Gülnarə Cəmaləddin tədbir iştirakçılarına təşəkkürlərini bildirərək, belə ədəbi-mədəni tədbirlərin milli-mənəvi dəyərlərin təbliği və gənc nəslin vətənpərvərlik ruhunda formalaşması baxımından mühüm əhəmiyyət daşıdığını vurğulayıblar.
“Ədəbiyyat və incəsənət”
(09.06.2026)
