İlhamə Məhəmmədqızı, “Ədəbiyyat və incəsənət”
Sumqayıt Dövlət Rəsm Qalereyasında adı şəkilən qurumun Sumqayıt şəhər Əhməd Bakıxanov adına 1 nömrəli Uşaq İncəsənət Məktəbinin təşkilatçılığı, AYB Sumqayıt bölməsi və Sumqayıt şəhər Mərkəzi Kitabxanasının dəstəyi ilə Azərbaycanın görkəmli boyakar rəssamı Mirzə Qədim İrəvaninin 200, şair və böyük maarifçi Seyid Əzim Şirvaninin 190 illik yubileylərinə həsr olunmuş “Şeirdən doğan rənglər” adlı sərgi-tədbir təşkil edilib.
Ulu Öndər Heydər Əliyevin və ölkəmizin ərazi bütövlüyü uğrunda canından keçmiş şəhidlərin xatirəsi bir dəqiqəlik sükutla yad edilib və Dövlət Himni səsləndirilib.
Moderator Aliyə Rüstəmzadə çıxışında Mirzə Qədim İrəvani və Seyid Əzim Şirvaninin yubileylərinin respublika üzrə yüksək səviyyədə qeyd olunduğunu vurğulayaraq, Sumqayıtda da bu istiqamətdə keçirilən tədbirlərin peşəkarlıqla icra edilməsini xüsusi qeyd edib.
Sumqayıt Dövlət Rəsm Qalereyasının direktoru Ellada Həsənova Mirzə Qədim İrəvaninin Azərbaycan rəngkarlığının təşəkkülündəki rolundan bəhs edib, onun Şərq miniatürü və xalq sənətinin ənənələrini Avropa realist boyakarlığı ilə uğurla sintez edərək özünəməxsus üslub yaratdığını bildirib. O, həmçinin Seyid Əzim Şirvaninin Azərbaycan ədəbi və ictimai fikir tarixindəki mühüm mövqeyini, maarifçilik ideyalarının bu gün də aktuallığını qoruduğunu vurğulayıb. Direktora görə, bu qəbildən olan sərgi-tədbirlər klassik irsin təbliği baxımından xüsusi əhəmiyyət daşıyır.
Daha sonra çıxış edən AYB Sumqayıt Bölməsinin sədri Gülnarə Cəmaləddin, Əli Kərim adına Poeziya Evinin direktoru İbrahim İlyaslı, sənətşünas və Fəxri Mədəniyyət işçisi Nəsibə Şükürova, miniatür ustası Babək Rüstəmzadə, şair-qəzəlxanlar Lilpar Cəmşidqızı, Elşad Xaqan Davudoğlu və Sadiq Cəfəri tədbirin əhəmiyyətini qeyd edərək Mirzə Qədim İrəvani haqqında maraqlı məqamları iştirakçıların diqqətinə çatdırıblar.
Bilidirilib ki, Seyid Əzim Şirvani yalnız böyük şair deyil, həm də cəmiyyətin maariflənməsi və inkişafı üçün çalışan ziyalı idi. Onun maarifçilik ideyaları və xalqın mənəvi yüksəlişinə xidmət edən irsi bu gün də yeni nəsillər üçün dəyərli yol göstərici hesab olunur.
Tədbirdə Uşaq İncəsənət Məktəbinin müəllimləri Nəsibə Şükürova və Kireqçi Rasinin şagirdləri Mirzə Qədim İrəvaninin əsərləri əsasında öz yaradıcılıq bacarıqlarını nümayiş etdirib, həmçinin Seyid Əzim Şirvaninin əsərlərinə çəkdikləri illüstrasiyaları təqdim ediblər.
Məktəbin digər müəllimlərindən Murad Hüseynov və Elnur Hüseynovun rəhbərliyi ilə hazırlanan musiqi kollektivləri tədbir çərçivəsində müxtəlif musiqi nömrələri ilə çıxış ediblər.
Sonda sərgi-tədbirdə iştirak edən məktəblilərə sertifikatlar təqdim olunub.
“Ədəbiyyat və incəsənət”
(28.11.2025)
