Şimali Kaliforniyada Azərbaycan Mədəniyyət Cəmiyyətinin (ACSNC) təşkilatçılığı ilə Zəfər gününə həsr olunmuş 3-cü “Breyn Rinq kuboku” intellektual yarışı keçirilib.
“Ədəbiyyat və incəsənət” portalına Diaspprla İş üzrə Dövlət Komitəsindən verilən məlumata görə, cəmiyyətin üzvləri və könüllüləri tərəfindən təşkil olunan yarış həm iştirakçılar, həm də qonaqlar tərəfindən maraqla qarşılanıb.
Cəmiyyətin Tədbirlərin təşkili və proqramlar üzrə meneceri Nurlan Şükürlü çıxış edərək bu cür tədbirlərin icma üzvləri arasında sosiallaşmağa və asudə vaxtın səmərəli təşkilinə müsbət təsir göstərdiyini söyləyib.
Azərbaycan dilində keçirilən yarışda dünya görüşü, Azərbaycanın film və mədəniyyəti ilə yanaşı, tarixi Zəfərimizlə əlaqədar suallar verilib.
Bədii hissədə cəmiyyət üzvləri Cavid Hüseynlinin skripkada çıxışını və Kəmalə Əliyevanın Azərbaycan xalq mahnılarını ifasını iştirakçılar maraqla qarşılayıblar.
Yarışda 6 komanda iştirak edib və sonda qalib komanda “Dəmir Yolları Mühəndisləri” olub. “Synergy” komandası ikinci yeri, “SVAze” komandası isə üçüncü yeri tutub. Qaliblər sertifikat və medallarla təltif olunublar.
Sualları doğru cavalandıran tamaşaçılara isə Zəfər rəmzi olan “Xarıbülbül” döş nişanları və suvenirlər təqdim edilib.
“Ədəbiyyat və incəsənət”
(14.11.2024)
