26 saylı Sabunçu Seçki Dairəsindən VIl çağırış Milli Məclisin üzvlüyünə namizəd, Vl çağırış Milli Məclisin Mədəniyyət Komitəsinin sədri, Böyük Quruluş Partiyasının başqanı Dr. Fazil Mustafa seçicilərlə növbəti görüş keçirib. “Bakıxanov qəsəbəsi, Murad Nağıyev küçəsi-28” ünvanında keçirilən görüşdə müxtəlif yaşda və sosial qrupdan olan seçicilər, Fazil Mustafanın seçki qərargahının üzvləri iştirak edib.

“Ədəbiyyat və incəsənət” portalına Fazil Mustafanın seçki qərargahından verilən məlumata görə, görüşdə Fazil Mustafa seçki platformasını şərh edib, eləcə də, ötən dönəmdə Millət vəkili olaraq gördüyü işlərdən danışıb. 

Namizəd seçiciləri maraqlandıran müxtəlif sualları cavablandırıb. Seçicilərin toxunduğu - uşaqlı qadınların iş saatının qısaldılması, pensiyaların artırılması, Bakıxanova metro stansiyasının çəkilməsi və s. kimi məsələlərə dair öz mövqeyini bildirən Fazil Mustafa, uyğun dövlət proqramlarından, görülmüş və nəzərdə tutulan irimiqyaslı layihələrdən, o cümlədən infrastruktur layihələrindən söz açıb, habelə mandat qazanacağı təqdirdə bu məsələləri parlamentdə, müvafiq dövlət orqanları qarşısında qaldıracağını bildirib.

Görüş qarşılıqlı maraq doğuran digər mövzuların müzakirəsi ilə davam edib.

“Ədəbiyyat və incəsənət”

(19.08.2024)