"YAŞAT" Fondunun, Azərbaycan Respublikasının Gənclər və İdman Nazirliyinin, Türkiyə Respublikasının Gənclik və İdman Nazirliyinin birgə təşkilatçılığı ilə Vətən müharibəsi şəhidlərinin övladları üçün Türkiyənin Antalya şəhərində yay düşərgəsi maraqlı məqamlarla davam edir.
Şəhidlərimizin 18-22 yaş aralığındakı qız övladlarının qatıldığı yay düşərgəsi 21 iyul tarixinədək davam edəcək. Layihənin ikinci hissəsində şəhidlərimizin oğlan övladları iştirak edəcəklər.
“Ədəbiyyat və incəsənət” portalı fonda istinadən xəbər verir ki, həmin düşərgə 29 iyul - 3 avqust tarixini əhatə edəcək.
Düşərgənin əsas məqsədi gənclərin mədəniyyət və təcrübə mübadiləsində iştirakı, yeni dostluqların qurulması və beynəlxalq mühitin öyrənilməsidir. Düşərgə Türkiyə Respublikasının Gənclik və İdman Nazirliyinin nəzdində fəaliyyət göstərən Alaaddin Keykubat Kampında keçirilir. Burada şəhid övladları ilə birgə Türkiyənin fərqli bölgələrindən olan gənclər də iştirak edirlər.
Həftəlik proqram çərçivəsində müxtəlif idman növləri üzrə yarışlar, oxatma, dağa dırmanma, rafting, ebru sənəti, həmçinin liderlik bacarıqlarının inkişafı üçün seminar və təlimlər, düşərgə fəaliyyətləri, film gecəsi, intellektual və əyləncəli oyunları keçirilib. Kurşunlu şəlaləsinə və şəhər mərkəzinə ekskursiya təşkil olunub.
Ziyafətdə şəhid övladları türkiyəli iştirakçılarla birgə milli rəqsimizi ifa ediblər. Düşərgə iştirakçısı, şəhid Emil Nəzirovun qızı Aytən Nəzirli “Sarı gəlin” mahnısını ifa edib. Digər iştirakçı, şəhid Əfqan Abdurahmanovun qızı Hilalənin isə doğum günü qeyd olunub.
Düşərgənin qızlar üçün təşkil olunan həftəsi başa çatıb və onlar arıtq Vətənə qayıdıblar. Növbəti həftə isə şəhidlərimizin eyni yaş kateqoriyasından olan oğul övladlarının düşərgəsi başlayacaq.
Şəhidlərimizin müxtəlif yaş kateqoriyasına uyğun övladları üçün “YAŞAT” Fondu tərəfindən mütəmadi olaraq düşərgələr, müxtəlif kurslar, layihələr, təlimlər təşkil edilir, onların yüksək səviyyəli təhsilinə dəstək göstərilir.
Xatırladaq ki, “YAŞAT” Fondunun təşkilatçılığı ilə şəhid övladlarından ibarət daha bir qrup Londonda yay məktəbində iştirak edir.
“Ədəbiyyat və incəsənət”
(23.07.2024)
