Ötən gün Beynəlxalq Kitab Bağışlama Günü idi. Bu münasibətlə Abşeron - Xızı Regional Təhsil İdarəsinin təşəbbüsü,  AYB Sumqayıt bölməsi və 1 saylı məktəbin birgə təşkilatçılığı ilə elə həmin məktəbdə şəhərin qələm adamları ilə görüş keçirildi.

Bu barədə “Ədəbiyyat və incəsənət” portalına AYB Sumqayıt bölməsindən məlumat verilib. 

Abşeron- Xızı Regonal Təhsil  İdarəsinin Sumqayıt  sektorunun müdiri İman Ağayev  qonaqları salamladı və tədbir haqqında məlumat verdi.

AYB Sumqayıt bölməsinin sədri Gülnarə Cəmaləddin təhsillə işbirliyinin vacibliyini xüsusi olaraq qeyd etdi, gələcəyimiz olan uşaq və yeniyetmələrə kitabı sevdirməyin, onlarda kitaba maraq oyatmağın əhəmiyyətindən danışdı. Sonra tanınmış   qələm adamları - Rafiq Yusifoğlu, Süleyman Hüseynov, İbrahim İlyaslı, Hikmət Fərzəli, eləcə də AXRTİ-nin Metodiki Kabinetin metodisti Gülbahar Haqverdiyeva, AXRTİ- nin İnzibati sektorun aparıcı məsləhətçisi Səbinə Məmmədova çıxış edərək belə görüşlərin keçirilməsinin əhəmiyyətindən söz açdılar.

1 saylı məktəbin direktoru Kəmalə Hüseynova tədbirin təşkilində onlara dəstək olanlara və qonaqlara təşəkkürünü bildirdi. 

Uşaqlara kitablar paylandı və xatirə şəkilləri çəkdirildi.

“Ədəbiyyat və incəsənət”

(15.02.2024)