İlhamə Məhəmmədqızı, “Ədəbiyyat və incəsənət”
Xalqımızın zəngin milli-mənəvi dəyərlərinin, bolluğun, bərəkətin və xeyirxahlığın rəmzi olan Novruz bayramı Sumqayıtda xüsusi təntənə ilə qeyd edilib. Baharın gəlişinin sevincini bölüşmək üçün Sumqayıt Bulvarında möhtəşəm bayram tədbiri təşkil olunub.
Tədbirdə Sumqayıt Şəhər İcra Hakimiyyətinin başçısı Zakir Fərəcov, millət vəkilləri, hüquq-mühafizə orqanlarının rəhbərləri, idarə, müəssisə və təşkilatların nümayəndələri, şəhər ictimaiyyətinin üzvləri və minlərlə sakin iştirak ediblər.
Şəhər İcra Hakimiyyətinin başçısı Zakir Fərəcov bayram münasibətilə şəhər sakinlərini səmimi-qəlbdən təbrik edərək, Novruz tonqalını yandırıb. O, baharın ölkəmizə sülh, firavanlıq, xoşbəxtlik və rifah gətirməsini diləyib, Novruzun xalqımızın qədim tarixində oynadığı əhəmiyyətli roldan bəhs edib.
Qeyd olunub ki, Azərbaycan Respublikasının Prezidenti, Müzəffər Ali Baş Komandan İlham Əliyev Ümummilli Lider Heydər Əliyevin ideyalarını gerçəkləşdirərək, xalqımızın ən böyük arzusunu reallığa çevirdi. Ali Baş Komandanın rəhbərliyi altında rəşadətli Azərbaycan Ordusu torpaqlarımızı işğaldan azad etdi və artıq biz həmin müqəddəs torpaqlarda Novruz bayramını qeyd edirik.
Bayram tədbirində Dədə Qorqud və Bahar qızı öz xeyir-dualarını verərək, Novruzun xalqımıza ruzi-bərəkət, rifah və uğurlar gətirməsini arzulayıblar. Milli geyimli uşaqların şux rəqsləri, Kosa və Keçəlin şən zarafatları, eləcə də qədim xalq oyunları hər kəs tərəfindən böyük maraqla qarşılanıb.
Meydanda qurulan milli üslublu guşələrdə xalqımızın əsrlər boyu qoruyub yaşatdığı mədəni irsin ən gözəl nümunələri – milli geyimlər, qədim el sənətləri, zəngin Azərbaycan mətbəxi, xalq yaradıcılığı və sənətkarlıq nümunələri sərgilənib.
Bir sözlə, bayram şənliyi bütün iştirakçılarda Novruz ab-havası, xoş ovqat yaradıb.
“Ədəbiyyat və incəsənət”
(19.03.2025)
