İlhamə Məhəmmədqızı, “Ədəbiyyat və incəsənət”
Martın 8-i dünyanın hər yerində olduğu kimi, respublikamızda da Beynəlxalq Qadınlar Günü kimi qeyd edilir. Bir az tarixə baş vursaq, bu günün mənşəyini müəyyənləşdirə bilərik.
Qadın hərəkatının tarixi 1857-ci ildə Nyu-Yorkda qadınların 12 saatlıq iş gününə etirazı ilə başlayıb. 1910-cu ildə alman sosialist qadın Klara Setkin 8 martın dünya qadınlar günü kimi rəsmiləşdirilməsinə nail olub.
Qadınlar günü ilk dəfə 1911-ci ildə Almaniya, Avstriya, İsveçrə və Danimarkada keçirilib və sonralar ənənə halını alıb.
O vaxtdan bütün ölkələrdə qadınlar 8 Martı sülh uğrunda mübarizədə həmrəylik günü kimi də qeyd edirlər. 1965-ci ildən keçmiş SSRİ-də 8 Mart - Beynəlxalq Qadınlar Günü istirahət günü elan olunub.
Azərbaycan müstəqillik əldə etdikdən sonra da 8 Mart - Beynəlxalq Qadınlar Günü ölkədə qeyri-iş günüdür.
Sumqayıt şəhərində 8 Mart Beynəlxalq Qadınlar günü münasibətilə bayram tədbirində əvvəlcə şəhidlərimizin əziz xatirəsi bir dəqiqəlik sükutla yad edildi, dövlət himni səsləndirildi.
Sumqayıt şəhər İcra Hakimiyyətinin başçısı Zakir Fərəcov 8 Mart - Beynəlxalq Qadınlar Günü münasibətilə qadınları ürəkdən təbrik etdi, onların cəmiyyətimizdəki misilsiz rolunu yüksək qiymətləndirdi.
Şəhər rəhbəri çıxışında vurğuladı ki, Azərbaycan qadını tarix boyunca öz zəngin mənəvi dünyası, müdrikliyi, fədakarlığı və qətiyyəti ilə yalnız ailədə deyil, həm də ictimai həyatın bütün sahələrində mühüm mövqe tutmuşdur. Onlar milli dəyərlərimizi qoruyub saxlamaqla yanaşı, elm, mədəniyyət, incəsənət, iqtisadiyyat və siyasət sahələrində də öz sözlərini demiş, ölkəmizin inkişafına mühüm töhfələr vermişlər.
Respublikamızda dövlət-qadın siyasətinin əsasını qoyan Ümummilli Lider Heydər Əliyev qadın şəxsiyyətinə böyük hörmətlə yanaşmışdı. Ulu Öndər ölkə həyatının bütün sahələrində qadınlara xüsusi yer ayırmış, onların hərtərəfli fəaliyyətinə geniş meydan vermiş, lider qadınlar yetişdirmişdi. Prezident cənab İlham Əliyevin rəhbərliyi ilə həyata keçirilən uğurlu siyasət nəticəsində qadınların cəmiyyətin bütün sahələrində fəal iştirakına geniş imkanlar yaradılmış, onların bilik və bacarıqlarını reallaşdırması üçün əlverişli şərait təmin olunmuşdur. Dövlətimizin sosial, iqtisadi, siyasi və mədəni inkişafı Azərbaycan qadınının cəmiyyətdə daha fəal rol oynamasına, onların liderlik keyfiyyətlərini ön plana çıxarmasına zəmin yaratmışdır.
Tədbirdə həmçinin qeyd olundu ki, Sumqayıtın sosial-iqtisadi inkişafında, elmi və mədəni həyatında qadınların əvəzsiz xidmətləri var. Onlar təkcə ailə dəyərlərinin qoruyucusu kimi deyil, eyni zamanda, innovasiya və tərəqqiyə töhfə verən fəal vətəndaşlar kimi də mühüm rol oynayırlar. Sumqayıt şəhərində qadınlar ictimai-siyasi, iqtisadi və sosial həyatın bütün sahələrində öz bacarıqlarını nümayiş etdirir, yeni nailiyyətlər qazanaraq şəhərin inkişafına layiqli töhfələr verirlər.
Daha sonra Zakir Fərəcov cəmiyyətin müxtəlif sahələrində yüksək nailiyyətlər qazanan, şəhərin inkişafına töhfə verən bir qrup qadına fəxri fərmanlar təqdim etdi.
Rəsmi hissədən sonra tanınmış müğənnilərin iştirakı ilə konsert proqramı oldu.
“Ədəbiyyat və incəsənət”
(07.03.2025)
