İl başında qardaş türk ölkələrindən həmyerlilərimizin xoş xəbərləri də gəlməkdədir. Bu dəfə özbəkistanlı həmyerlimizin daha bir xoş xəbəri gəlib.

Özbəkistan Respublikası Mədəniyyət Nazirliyinin Daşkəndin Türküstan sarayında “Ən fəal mədəniyyət və sənət xadimləri” Milli Mükafatının təqdimat mərasimi keçirilib. 

Bu mükafata layiq görülən 15 nəfər  sənət və söz adamları içərisində əsli Bakının İçərişəhərindən olan, Özbəkistanda doğulub boya başa çatan həmyerlimiz, görkəmli opera ustası Cəbrayıl  İdrisov da vardır. 

“Ədəbiyyat və incəsənət” portalına Özbəkistan Respublikası Əlişir Nəvai adına Akademik Opera və Balet Teatrının solisti, bas səsli opera müğənnisi Cəbrayıl İdrisovdan daxil olan məlumata görə, Cəbrayıl İdrisov Mədəniyyət nazirliyinin “Etiraf” və “İlin opera ifaçısı” mükafatlarına layiq görülüb.

Mükafatların təqdim olunması mərasimində iştirak edən Özbəkistan Mədəniyyət naziri Azadbek Nazarbekov deyib ki, nazirliyin bu ənənəvi mükafatına yalnız zəhmət çəkənlər, ölkənin ictimai və mədəni hıəyatında yaxından iştirak edənlər, Vətəninin adına şərəf gətirənlər layiq görülürlər.

Xatırladaq ki, bu ilin noyabr ayında Azərbaycanda keçirilən Özbəkistan Mədəniyyəti günlərində təqdim olunan “Riqoletto” operasında Cəbrayıl İdrisov baş roillardan birini ifa edirdi.

“Ədəbiyyat və incəsənət”

(27.12.2022)