Joldubek Kaçkınbayev, “Ədəbiyyat və incəsənət” portalının Qırğızıstan təmsilçisi

Aprelin 21-də Azərbaycan Respublikasının Qırğızıstan Respublikasında keçirilən Mədəniyyət Günləri çərçivəsində Satılqanov adına Qırğızıstan Milli Filarmoniyasında Azərbaycan incəsənət ustalarının qala-konserti keçirilib. 

Mədəniyyət tədbirində Qırğız Respublikasının mədəniyyət, informasiya və gənclər siyasəti naziri Mirbek Mambetəliyev, Azərbaycan Respublikasının mədəniyyət naziri Adil Kərimli, o cümlədən Azərbaycan Respublikasının Qırğız Respublikasındakı fövqəladə və səlahiyyətli səfiri, mədəniyyət xadimləri və geniş ictimaiyyət iştirak edib.

Tədbirin rəsmi hissəsində Qırğızıstan Respublikasının mədəniyyət naziri Mirbek Mambetəliyev bu konsertin iki ölkə arasında dostluq və mədəni əməkdaşlığın bariz rəmzi olduğunu qeyd edərək, qırğız və Azərbaycan xalqlarını çoxəsrlik tarix, zəngin mədəni irs, adət-ənənələr, mənəvi dəyərlərlə birləşdirdiyini qeyd edib.

Qala-konsertdə səhnəni əsl sənət təntənəsinə çevirən Azərbaycan xalqının milli mahnı və rəqsləri səsləndirilib. 

Eyni zamanda, Azərbaycan milli alətlərinin müşayiəti ilə qırğız xalqının klassik əsərləri ifa olunub. Atay Oqonbayevin “Maş Botoy” havası, xalq mahnısı “Komuzçu”, Kalı Moldobasanovun “İssık-Kul valsı”, Muratbek Beqaliyevin “Qırğızıstan” mahnılarının məharətlə ifaları tamaşaçılarda xüsusilə böyük təəssürat yaradıb.

“Ədəbiyyat və incəsənət”

(22.04.2025)