Könül, “Ədəbiyyat və incəsənət”
Dəyərli bir kitabla ölkə boyu, addım-addım. Bu dəfə “Mirvarid Dilbazi Poeziya Məclisi İctimai Birliyi Göygölə rayonuna səfər etmişdi, Gəncə -Daşkəsən Regionol Mədəniyyət Baş İdarəsi və Heydər Əliyev Mərkəzinin birgə təşkilatçılığı ilə “Vətən oğulsuz olmasın” kitabının təqdimat mərasimi keçirilirdi. Tədbirdə yenə də mədəniyyət, ədəbiyyat, ictimaiyyət, media və şəhid ailələrinin nümayəndələri, tələbə-gənclər iştirak edirdi. “Mirvarid Dilbazi Poeziya Məclisi” İctimai Birliyinin sədri, Kəlağayı muzeyinin direktoru, şair-publisist Güllü Eldar Tomarlıdan tədbir barədə fikrini aldıq. Güllü xanım söylədi:
-Öncə Ulu Öndər Heydər Əliyevin və Azərbaycanın ərazi bütövlüyü uğrunda canlarını fəda etmiş Qarabağ müharibəsi şəhidlərinin əziz xatirəsi bir dəqiqəlik sükutla yad edildi. Tədbiri giriş sözü ilə açdım, təqdimatı keçirilən “Vətən oğulsuz olmasın” kitabının Ulu Öndər Heydər Əliyevin 100 illik yubileyi çərçivəsində nəşr edildiyini və ilk təqdimatının 20 iyul, 2023-cü ildə M.S.Ordubadi adına Naxçıvan Muxtar Respublika Kitabxanasında, sonra 5 dekabr, 2023-cü ildə Cəfər Cabbarlı adına Respublika Gənclər Kitabxanasında, 8 dekabrda Sabirabadda Bayraq Muzeyində, eləcə də Bərdədə Bələdiyyə Binasında keçirildiyini qeyd etdim. Bildirdim ki, kitabda Ulu Öndərin Xalq şairi Mirvarid Dilbazi ilə görüşündə söylənilən nitqləri, səsləndirilən fikirləri, Mirvarid xanımın xalqın müdrik oğluna həsr etdiyi şeirləri toplanıb. Və qeyd etdim ki, kitabın növbəti təqdimatları Ağsu rayonunda, Sumqayıt şəhərində və digər bölgələrdə keçiriləcək.
Mirvarid Dilbazi Poeziya Məclisinin üzvü, şair Mələk İsmayıl tədbir iştirakçılarını salamlayaraq Ulu Öndər Heydər Əliyevin ədəbiyyat, mədəniyyət, poeziya sahəsinə olan qayğısından, şair və yazıçılara olan dərin hörmət və ehtiramından söhbət açdı, “Vətən oğulsuz olmasın” kitabında toplanan faktların tarixi əhəmiyyət daşıdığını, Ulu Öndərin Xalq şairinə olan xoş münasibətinin bariz nümunəsi olduğunu bildirdi və Ulu Öndərə həsr etdiyi şeirlərini söylədi.
Sonra Göygöl rayon Mədəniyyət Mərkəzinin direktoru Əminə Rəhimova, Göygöl rayon Təhsil sektorunun metodisti, sair, publisist Afət Qara qızı, Mərkəzləşmiş kitabxana sisteminin direktoru İntizar Əliyeva və başqaları çıxış edib kitabın Ulu Öndər haqqında yazılan çox dəyərli mənbə və nəşrlərdən biri olduğunu vurğuladılar. Qeyd edildi ki, Milli Lider Heydər Əliyev özü mədəniyyətə bağlı insan olduğu qədər də mədəniyyət işçilərinə, şair və yazıçılara, sənət adamlarına həmişə diqqət və qayğı göstərib.
Sonda təqtimat mərasimində kitabda toplanan və Milli liderə həsr olunan şeirlər səsləndirildj, tədbir iştirakçılarına kitablar hədiyyə olundu.
“Ədəbiyyat və incəsənət”
(15.12.2023)
