Tanınmış gürcü müğənnisi Veriko Turaşvili SSRİ və Azərbaycanın Xalq artisti, Gürcüstanın Əməkdar artisti Rəşid Behbudovun ilk dəfə ifa etdiyi “Bahar sənsiz” mahnısına klip çəkdirib. Mahnının sözləri Ənvər Əlibəyliyə, musiqisi isə Rauf Hacıyevə məxsusdur. 

AzərTAC xəbər verir ki, iyunun 22-də Tbilisidəki M.F.Axundzadə adına Azərbaycan Mədəniyyəti Muzeyində klipin təqdimatı olub. 

Mərasimdə muzeyin direktor müavini Leyla Əliyeva bildirib ki, V.Turaşvili Azərbaycanın xalq və bəstəkar mahnılarına böyük maraq göstərir. O, artıq bir neçə mahnını həm gürcü, həm də Azərbaycan dillərində məharətlə ifa edib.

V.Turaşvili deyib ki, Azərbaycan bəstəkarlarının yaradıcılığına böyük marağı var: “Bu mahnıları ifa etməkdə məqsəd Azərbaycan mədəniyyətini təbliğ etmək, eləcə də ölkələrimiz arasında mədəni əlaqələrin inkişafına töhfə verməkdir”.

Müğənni bildirib ki, bu gün təqdim olunan klipin mahnısı Türkiyədə yazılıb, klip isə Tbilisidə çəkilib. Klipin çəkilişi zamanı istifadə olunan Azərbaycan mədəniyyət, incəsənət nümunələri M.F.Axundzadə adına Azərbaycan Mədəniyyəti Muzeyi tərəfindən təqdim edilib.

Onun sözlərinə görə, “Ay Laçın” və “Sarı gəlin” mahnılarının yazılması və bu bəstələrə klipin çəkilişi Azərbaycan torpaqlarının işğaldan azad olunması ilə eyni vaxta təsadüf edir. 

“Bu təsadüfi deyil. Biz zəngin mədəniyyəti, əsrarəngiz təbiəti olan Azərbaycanın ərazilərinin işğaldan azad olunacağı günü gözləyirdik. Mahnılarımın da həmin ərəfədə üzə çıxması bizim töhfəmiz oldu”, – deyə müğənni vurğulayıb.

O deyib: “Mənim Azərbaycan mahnılarına böyük marağım var idi və ilk dəfə “Arzu” mahnısını ifa etdim. Sonra isə “Sarı gəlin” və “Ay Laçın” mahnıları üzərində işlədim və uğur qazandım. Bu uğurlar məni daha da ruhlandırdı. Sonradan mən vaxtı ilə Tbilisidə anadan olan, görkəmli Azərbaycan müğənnisi Rəşid Behbudovun “Bahar sənsiz” mahnısını seçdim. Bu mahnıya klip çəkdirməkdən də çox məmnunam”.

V.Turaşvili gələcəkdə daha bir neçə mahnıya klip çəkdirmək niyyətində olduğunu bildirib.

Sonra klip nümayiş olunub. 

Qeyd edək ki, V.Turaşvili “Ay Laçın” mahnısını ifa etdikdən sonra Gürcüstanda Azərbaycan musiqilərinə maraq artıb. Gürcüstanın İctimai Televiziyasında (1tv.ge) keçirilən “Ranino” uşaq festivalında Anastasiya Vasadze “Ay Laçın” mahnısını uğurla ifa edib. Onun həmyaşıdları ilə təqdim etdiyi performans həm Azərbaycanda, həm də Gürcüstanda böyük maraqla qarşılanıb.

“Ədəbiyyat və incəsənət”

(23.06.2023)