Fikrət Əmirov I Ümumrespublika Musiqi Festivalı davam edir

Ölkəmizdə ilk dəfə baş tutan Fikrət Əmirov I Ümumrespublika Musiqi Festivalı öz işinə  Azərbaycan Bəstəkarlar İttifaqının təşkilatçılığı ilə görkəmli bəstəkar Fikrət Əmirovun həyat və yaradıcılığına həsr olunmuş "Azərbaycan musiqi mədəniyyətinin inkişafında Fikrət Əmirovun rolu" mövzusunda elmi seminarla başlayıb.

 

“Ədəbiyyat və incəsənət” portalına Fikrət Əmirov adına Gəncə Dövlət Filarmoniyasından verilən məlumata görə, festivalın təntənəli açılış mərasimi Müslüm Maqomayev adına Azərbaycan Dövlət Akademik Filarmoniyasında Göygöl Dövlət Mahnı və Rəqs Ansamblının (bədii rəhbər Xəyal Əliyev və Sahil Quliyev) iştirakı  ilə baş tutub. Açılışda Xalq artisti Şahnaz Haşımova, Əməkdar artist Sevinc Sarıyeva, Əməkdar mədəniyyət işçisi Mehparə Cəfərova, solistlər  Samir Məmmədov, Zəminə Mustafayeva, Rövşən Məmmədov, Anar  Quliyev, Şirxan Cahangirov, Azər Verdiyev “Böyük Dayaq” kinofilmindən Pərişanın mahnısı, "Qatar" təsnifi,  "Laylay", "Dağlar qızı reyhan", "Yar üçün", "Evləri var xana-xana", "Göygöl" və bəstəkarın digər  mahnılarını ifa ediblər.  Ansamblın "Nağaralarla rəqsi" böyük rəğbətlə qarşılanıb. 

Festivalın ilk günü, eyni zamanda Fikrət Əmirov adına Gəncə Dövlət Filarmoniyasında Xalq Çalğı Alətləri Orkestrinin (bədii rəhbər və dirijor Xəyal Qəhrəmanov)  müşayiəti ilə Xalq artisti Sevinc İbrahimova, Əməkdar artist Tural Abdullayev, Beynəlxalq və respublika müsabiqələr laureatı Mirnofəl Həsənov(tar), Seymur Sadıqov (balaban), solistlər Rüstəm Cəfərov, Fuad Ramazanov, “Küçələrə su səpmişəm", "Evləri var xana-xana" xalq mahnılarını, “Baharımsan”, "Gülərəm gülsən”, "Gülüm" romanslarını, “Aşıqsayağı”, "Kor ərəbin mahnısı"nı ifa ediblər.

Festivala martın 9-da yekun vurulacaq.

 

“Ədəbiyyat və incəsənət”

(06.03.2025)

 

Sayt Azərbaycan Respublikası Mədəniyyət Nazirliyi tərəfindən 2024-cü ildə “Qeyri-hökumət təşkilatları üçün qrant müsabiqəsi” çərçivəsində Azərbaycan Ədəbiyyat Fondunun həyata keçirdiyi “Yeniyetmə və gənclərdə mütaliə mədəniyyətinin formalaşdırılması” layihəsinin tərəfdaşı olaraq yenilənmiş, yeni bölmələr əlavə ediımiş, layihənin təbliği üzrə funksional fəaliyyət aparılmışdır.