Başa çatan X Bakı Beynəlxalq Kitab sərgisinin ən vacib məqamlarını vurğulamaqda davam edirik. Tərlan Seyidovun “Fərhad Bədəlbəyli. Musiqiyə səyahət” kitabının təqdimat mərasimi də bu cür vacib məqamlardandır. 

Təqdimatda “Şərq-Qərb” nəşriyyat departamentinin direktoru Sevil İsmayılova, baş redaktor Nərgiz Cabbarlı, Ü.Hacıbəyli adına Bakı Musiqi Akademiyasının rektoru, SSRİ və Azərbaycanın Xalq artisti, professor Fərhad Bədəlbəyli, BMA-nın İxtisas musiqi məktəb-studiyasının direktoru, sənətşünaslıq üzrə fəlsəfə doktoru, dosent Sevda Məmmədova, BMA-nın “Humanitar elmlər” kafedrasının müdiri, filologiya üzrə elmlər doktoru, professor Tərlan Quliyev və məktəb-studiyanın elmi-metodiki işlər üzrə direktor müavini, sənətşünaslıq üzrə fəlsəfə doktoru Aytən Baxşiyeva çıxış edərək kitab haqqında məlumat verdilər. 

N.Cabbarlı kitabın yalnız tədqiqatçılar və musiqişünaslar üçün deyil, eyni zamanda da geniş oxucu auditoriyası üçün nəzərdə tutulduğunu xüsusi olaraq vurğuladı. Çünki kitabda təqdim edilən fotoşəkillər F.Bədəlbəylinin həyat və yaradıcılığını, fəaliyyətini dolğun şəkildə əks etdirir.

Tədbirdə çıxış edən Fərhad Bədəlbəyli Azərbaycan musiqi sənətindən, klassik musiqiyə və ciddi musiqiyə Azərbaycan telekanallarının az yer ayırmasından və s. danışdı və oxucularının suallarını cavablandırdı. 

Daha sonra “Şərq-Qərb” ASC-nun rəhbərliyinə və əməkdaşlarına gözəl və nəfis kitab üçün minnətdarlığını ifadə etdi. Nəşriyyat departamentinin direktoru Sevil İsmayılova isə Azərbaycanın dəyərli elm və sənət adamları ilə əməkdaşlıqdan qürur duyduğunu bildirərək gələcəkdə də bu cür kitabların hazırlanacağına ümid etdiyini vurğuladı.

Təqdimatda BMA-nın IV kurs tələbələri – klarnet ifaçısı Rüfət Məmmədov və violin ifaçısı Kənan Məmmədzadə musiqi nömrələri ilə çıxış etdilər.

“Ədəbiyyat və incəsənət”

(10.10.2024)