MƏDƏNİYYƏT NAZİRLİYİ ÖLKƏNİ TEATRLAŞDIRIR
Yeni mədəniyyət nazirinin teatr və kino sahəsinə bir canlanma gətirdiyi göz önündədir. Diqqətçəkən məqamlardan biri də, ölkə teatrlarının bölgələrə qastrolları, hər bir rayonun teatrlaşdırılmasıdır.
Növbəti xəbərimiz bu barədədir.
Mədəniyyət Nazirliyinin Ümummilli Lider Heydər Əliyevin anadan olmasının 100 illiyi və Azərbaycan peşəkar milli teatrın yaranmasının 150 illiyinə həsr edilmiş silsilə tədbirləri çərçivəsində Azərbaycan Dövlət Kukla Teatrının kollektivi Şabran və Quba rayonlarına səfər edib. Bu barədə “Ədəbiyyat və incəsənət” portalı sizləri məlumatlandırmışdı.
Yaradıcı heyət hər iki rayonun mədəniyyət mərkəzində balaca teatrsevərlər üçün repertuarlarındakı baxımlı səhnə nümunələrindən olan “Gözəl və Bədheybət” tamaşasını təqdim edib.
Fransız yazarı Madam Leprens De Bomonun məşhur əsəri əsasında hazırlanan eyniadlı səhnə işinin quruluşçu rejissoru Anar Məmmədov, quruluşçu rəssamı İqbal Əliyev, bəstəkarı Cahangir Zülfüqarovdur.
Tamaşada rolları teatrın aparıcı aktyorları Elnur Abbasquliyev, Səriyyə Mansurova, Rəhim Rəhimov, Aygül Ağayeva, Araz Həsənli, Cavid İbrahimov və Könül Nəsibova ifa edirlər.
Birhissəli uşaq tamaşasında fərqli texnikalarda hazırlanmış kuklalardan, eləcə də canlı planda kukla oyunu sintezindən istifadə olunur.
Musiqi və xoreoqrafik elementlərlə zəngin səhnə əsərində bir qızın timsalında xoş rəftar və daxili gözəlliyin bütün maneələri aşması nümayiş etdirilir. Bu nümunə vasitəsilə uşaqlara zahiri gözəlliklə yanaşı, səbir və ədalət hissinin də hər məqamda ən yaxın yol yoldaşı olduğu göstərilir.
Hər iki rayonda reallaşan nümayiş rayon ictimaiyyəti, xüsusən də balaca tamaşaçılar tərəfindən böyük maraqla qarşılanıb.
Böyük tamaşaçı izdihamı və alqışlarla keçən hər iki tamaşalarda iştirak edən teatrsevərlər, xüsusən də Quba sakinləri uşaqlarda teatra maraq yaratmaq üçün belə nümayişlərin mütəmadi olmasını arzu ediblər.
Diqqət və marağa görə tamaşaçılara təşəkkür edən Azərbaycan Dövlət Kukla Teatrının direktoru, Əməkdar mədəniyyət işçisi Rəşad Əhmədzadə kuklaçıların müxtəlif layihələr, sosial-mədəni aksiyalar çərçivəsində bölgələrə mütəmadi səfərlər etdiklərini, yeni mövsümdən həyata keçiriləcək ölkədaxili qastrollar siyahısına Qubanın da daxil olunacağını deyib. Həmçinin səfərin təşkili və yüksək səviyyədə reallaşmasında əməyi keçən hər kəsə minnətdarlığını bildirib.
Bəli, böyüklər öz yerində, amma uşaqlar üçün teatr tamaşaları çox faydalıdır. Onlar həm əylənir, həm bilgilər alır, həm didaktik fayda görürlər. Üstəlik də, vampir kimi onların qanını soran mobil telefondan, internetdən aralana bilirlər.
Mədəniyyət Nazirliyinə və teatrlara alqışlar düşmürmü, düşür.
“Ədəbiyyat və incəsənət”
(23.06.2023)
