Mayın 3-dən 5-dək Azərbaycan paytaxtında Bakı Şəhər İcra Hakimiyyəti, Rusiyanın Azərbaycandakı səfirliyi, Bakıdakı Rus Evi, Azərbaycan Respublikasının Mədəniyyət Nazirliyinin dəstəyi ilə Moskva hökuməti tərəfindən təşkil olunan “Moskva Günləri” keçirilir.
Bakıda “Moskva Günləri” çərçivəsində Heydər Əliyev Mərkəzində Rusiya Coğrafiya Cəmiyyətinin “Köhnə Bakı Rusiya Coğrafiya Cəmiyyətinin obyektivində: şəhərin ilk fotoşəkilləri” fotosərgisi açılıb, eləcə də “Turetski xoru” və “SOPRANO” bədii kollektivinin konserti keçirilib.
AzərTAC xəbər verir ki, tədbiri Moskva hökumətinin naziri, Moskva şəhərinin xarici iqtisadi və beynəlxalq əlaqələr şöbəsinin müdiri Sergey Çeremin açıb. O qeyd edib ki, Azərbaycan ilə Rusiyanı ildən-ilə möhkəmlənən uzunmüddətli dostluq münasibətləri birləşdirir.
Heydər Əliyev Mərkəzinin foyesində qonaqlar hələ XIX əsrin ortalarında Aleksandr Ulski tərəfindən çəkilmiş Bakının ilk fotoşəkillərinə maraqla baxıblar. O, Nikolay İvaşintsovun rəhbərlik etdiyi Xəzər Hidroqrafik Ekspedisiyasının üzvü olub. “Bu köhnə Bakının unikal kadrlarıdır, onların sayəsində biz keçmişə “qayıda” və Azərbaycan paytaxtının 100 ildən çox əvvəl necə olduğunu görə bilərik. Bakının ən erkən fotoşəkili 1857-ci ildə Aleksandr Ulski tərəfindən çəkilib. Bu fotoşəkil “Quba” gəmisinin qəzaya uğradığı "Şoulan burnunda qaya" adlanır. Ola bilsin ki, bu Qafqazda ilk mənzərə şəklidir”, - deyə Rusiya Coğrafiya Cəmiyyətinin icraçı direktorunun birinci müavini İlya Qurov bəhs edir. Qeyd edək ki, Rusiya Coğrafiya Cəmiyyətinin fondlarında Azərbaycanla bağlı böyük miqdarda kitab, fotosənəd və xəritələr saxlanılır. Ən qədim xəritə XVI əsrin əvvəllərində nəşr olunub.
Sonra "SOPRANO" qadın qrupunun solistləri ilə birlikdə Rusiyanın “Turetski xoru” bədii qrupunun konserti olub. Artistlər Bakı sakinləri üçün rus xalq mahnılarından tutmuş dünya operettasının və Avropa estradasının şah əsərlərindən ibarət proqram hazırlayıblar. Konsert Müslüm Maqomayevin repertuarından "Azərbaycan" mahnısı ilə başa çatıb.
“Ədəbiyyat və incəsənət”
(05.05.2023)
