“Ədəbiyyat və incəsənət” portalının əməkdaşı Aida Eyvazlının Qazaxıstandan reportajı
Qazaxıstanın paytaxtı Nursultan şəhərində keçirilən Dünya Liderlərinin və Ənənəvi Dinlərin VII Qurultayında dünyanın 50 ölkəsindən 100-dən artıq dini lider qonaq qismində qarşılanıb. Bundan əlavə, Dini Liderlərin Qurultayını dünyanın 60-dan artıq ölkəsindən gəlmiş 160 nəfərə qədər xarici jurnalist, o cümlədən təkcə Vatikandan gəlmiş 81 Kütləvi İnformasiya təmsilçisi işıqlandırır.
Qazaxıstanın 2003-cü ildən bəri ev sahibliyi etdiyi Dünya Liderlərinin və Ənənəvi Dinlərin Qurultayında ilk dəfə olaraq Poma Papası Fransisk də iştirak edir. Ötən gün Qazaxıstan prezidenti Kasım Cömərt Tokayev dünyanın tanınmış din xadimləri ilə, eləcə də Misirin, həmçinin Əl-Əzhər Universitetinin ali imamı Şeyx Əhməd ət-Tayyibi ilə, Qafqaz Müsəlmanları İdarəsinin sədri şeyxülislam Allahşükür Paşazadə ilə, Roma Papası, Roma Pontefiki Fransisklə tet-a-tet görüşlər keçirib. Dünən habelə Qazaxıstan Prezidenti Roma Papası vətəndaş cəmiyyətinin və diplomatik korpusun nümayəndələri ilə “Qazaxıstan” Konsert Mərkəzində görüş keçirib. Təbii ki, xristian dünyasının dini lideri və onun təmsilçiləri ilə müsəlman ölkəsində düzənlənən bu görüş medianın ən çox diqqətini çəkən bir görüş idi. Odur ki, biz də böyük məmnuniyyətlə bu görüşə qatılıb onun detallarını portalımızın oxucularına açıqlamaq qərarına gəldik.
Görüşü açaraq Qazaxıstanın dövlət Başçısı Qasım Comərt Tokayev bu günün tarixi əhəmiyyətindən danışdı, dedi ki, Roma Papası Fransisk ilk dəfədir ki, Qazaxıstana apostol səfəri edir. Bu il həm də Qazaxıstanla Vatikan arasında diplomatik əlaqələrin 30 ili tamam olur. O, həmçinin bəşəriyyətin rifahı naminə Pontifikin yorulmaz və fədakar səylərini alqışladığını dedi.
“Belə hesab edirəm ki, artıq dünyanın müxtəlif mədəniyyətlərinin və dinlərinin insanlarını sülh naminə, sosial harmoniya və birgə dəyərlər naminə birləşdirməyin vaxtı yetişib”, -deyən dövlət başçısı, eyni zamanda Qazaxıstanın 30 illik müstəqilliyi dövründə millətlərarası və dinlərarası həmrəylik sahəsində “Müxtəliflikdə Birgəlik” adlı xüsusi modelinin olduğunu diqqətə çatdırdı. Mərkəzi Asiya regionunda Qazaxıstanın burada yaşayan insanlara və dinlərə tolerant münasibətdə xüsusi rolu olduğunu söylədi. 2003-cü ildən bəri Dünya Liderlərinin və Ənənəvi Dinlərin ilk Qurultayından sonra bu platformada keçirilən müzakirələrin və qəbul olunana qərarların regionda sabitliyin və dincliyin qorunmasında xüsusi rolundan, katolik kilsəsinin rəhbərinin ölkəyə ilk səfərinnin də ölkədəki dinlərarası münasibətlərə, dünyadakı bütün katoliklərin ürəklərində xoşbəxtlik və sevinc yaradacağına əmin olduğunu bildirdi.
Tədbir iştirakçılarına salamlayan Roma Papası Fransisk öz nitqində qədim Qazaxıstan torpağına apostol səfərindən zövq aldığını, buraya dünyada sülh və sabitliyin yolunu, dialoq və birliik yolunu tapmaq üçün ziyarətə gəldiyini dedi. O öz çıxışına “Uğurun əvvəli Birlikdədir” –atalar sözü ilə başladı. Bəli, bu belədir,- dedi. Əlavə etdi ki, “Qazaxıstanda 150 etnik qrup və 80 dən çox dildə danışan millətlər yaşayır. Bu dillərdə danışan insanların hər biri öz tarixini, mədəniyyətini, din və ənənələrini qoruyaraq Qazaxıstanın nadir yarımetnik, multikultural və çoxkonfessiyalı laboratoriyasına gözəl bir simfoniya yaradırlar”.
Roma Papası Qasım Comərt Tokayevin ölkədə ölüm hökmünü qadağan etməsini də alqışladı. O, eyni zamanda bu gün dünyada hökm sürən qeosiyasi gərginliklərin fonunda diplomatik səylərin artırılmasının vacibliyindən danışdı. Dinlərarası dialoqda bəşəriyyətin ümumi nəfi naminə görülən işlərdən ümidlə nəticə gözlədiyini bildirdi. Roma Papası bu yolda səylərini əsirgəməyənlərin hamısını dəstəklədiyini xüsusən qeyd etdi.
“Qazaxıstan” Konsert Mərkəzində keçirilən görüşdə necə ki millətlər, eləcə də dinlər arasındakı sərhədlər olduqca şəffaf, görünməz idi. Bu isə dünyamızda gec-tez sülh, əmin-amanlıq qurulacağına bir inam doğururdu. İnam doğururdu ki, hər yanda toplar susacaq, əvəzinə şən musiqi səsləri ərşə ucalacaq.
