Milli Məclisin üzvü, İctimai birliklər və dini qurumlar komitəsinin sədri Fazil Mustafa növbəti vətəndaş qəbulu günündə bir qrup vətəndaşla, o cümlədən vətəndaş cəmiyyəti institutlarının təmsilçiləri ilə görüşüb.
“Ədəbiyyat və incəsənət” portalı xəbər verir ki, Milli Məclisdə keçirilən qəbulda qeyri-hökumət təşkilatlarının rəhbərləri – Vüqar Tofiqli, Tofiq Əlizadə, Muhammet Kıldizə, Elməddin Məmmədzadə, ictimaiyyət nümayəndələri – Anna Alekseyevna, Sevinc Rüstəmova, Sevda Eyyubova, dövlət qulluğu imtahanında yüksək nəticə göstərmiş gənc ictimai fəal Nərmin Məmmədzadə, pedaqoq Həbib Hacıyev və digərləri iştirak edib.
QHT rəhbərləri fəaliyyətləri, həyata keçirdikləri layihələr, qarşılaşdıqları çətinliklər və gələcək planları barədə komitə sədrinə məlumat verib. Onların çıxışlarında sektorun inkişafı yönündə təkliflər də səsləndirilib.
İctimaiyyət nümayəndələri isə daha çox sosial məsələlər – işsizlik, güzəştli proqramlara çıxış imkanları, əfv və sosial müdafiə ilə bağlı çətinliklərə dair müraciətlərlə çıxış edib.
Komitə sədri Fazil Mustafa vətəndaşları maraqlandıran məsələlərə münasibət bildirib, bir sıra müraciətlərin aidiyyəti dövlət orqanlarına göndəriləcəyini və icrasının nəzarətdə saxlanılacağını vurğulayıb.
“Ədəbiyyat və incəsənət”
(18.04.2025)
