İmran Verdiyev, Azərbaycan Respublikasının Əməkdar müəllimi. “Ədəbiyyat və incəsənət” portalının Oğuz təmsilçisi

Şəki-Zaqatala Regional Gənclər və İdman İdarəsinin Oğuz Rayon Sektorunun, Oğuz Rayon Tarix-Diyarşünaslıq muzeyinin, Oğuz şəhər 2 saylı Texniki- Təbiət təmayüllü liseyinin birgə təşkilatçılığı ilə 20 Yanvar faciəsinin növbəti dönümünə həsr olunmuş anım tədbiri keçirib.

Tədbirin əvvəlində 20 Yanvar şəhidlərinin, eləcə də Vətənimizin bütövlüyü və milli müstəqilliyimiz uğrunda canlarını fəda etmiş bütün şəhidlərin əziz xatirəsi bir dəqiqəlik sükutla yad edildi. Sonra Oğuz Rayon Diyarşünaslıq Muzeyin əməkdaşı A.Suleymanovanın "Qanlı və Şanlı Yanvar" adlı məruzəsi dinlənildi, 20 yanvar hadisələrindən bəhs edən sənədli film nümayiş olundu.

Tədbirdə çəhərdəki texniki-təbiət liseyinin direktoru Q.Suleymanova, tərbiyə işləri üzrə direktor müavini S.Kərimov, Şəki- Zaqatala Regional Gənclər və İdman İdarəsinin Oğuz rayonu üzrə sektor müdiri Ş.Rüstəmov çıxış etdilər.

Çıxışlarda qeyd olundu ki, 20 Yanvar tariximizdə təkcə faciə deyil, Azərbaycanın istiqlal yolunun ilk zirvəsi, milli məfkurəmizin azadlıq istəyinin oyanışı, sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir. 

Sonda şəhidlərə həsr olunmuş şeirlər, mahnılar səsləndirildi.

“Ədəbiyyat və incəsənət”

(17.01.2025)