Bu gün Mədəni İnkişaf Mərkəzi İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə ərsəyə gələn “Maddi-mədəni irsimizin qorunması” qısametrajlı sənədli filminin təqdimatı keçirilib.
Təqdimat Bakı şəhəri Binəqədi Gənclər Evi Sosial Xidmət Müəssisəsində baş tutub. Tədbirdə QHT sədrləri və rayon ictimaiyyəti nümayındələri iştirak ediblər.
Qeyd edək ki, layihənin rəhbəri Gəray Əlibəyov, filmin redaktoru Elnarə Məhərrəmova, quruluşçu rejissor Rais Bəhrami, quruluşçu operator Sənan Əlibəyovdur.
“Ədəbiyyat və incəsənət” portalı İB-yə istinadən xəbər verir ki, öncə şəhidlərimizin əziz xatirələri bir dəqiqəlik sükutla yad edilib. Tədbiri açılış nitqi ilə başlayan filmin redaktoru, Regional Sosial-İqtisadi İnkişaf üzrə Maarifləndirmə İctimai Birliyinin sədri Elnarə Məhərrəmova Layihə haqqında məlumat verərək qeyd edib ki, “Maddi-mədəni irsimizin qorunması” qısametrajlı sənədli filmində məqsəd erməni saxtakarlığını dəqiq faktlarla, ingilis dilində Azərbaycan alimlərinin və mütəxəssislərin araşdırmasında dünyaya bəyan etməkdir.
Tədbirdə iştirak edən Vətəndaşların Sosial Rifahı Naminə” İctimai Birliyinin sədri İradə Riza-zadə, “Ailə Dünyası" Ailələrə Hüquqi Yardım İctimai Birliyinin sədri Gülayə Səfərova, İstedadlı Əlillər İctimai Birliyinin sədri Qubad Qasımov, “Vətənpərvər Maarifçi Gənclər” İctimai Birliyinin nümayəndəsi Arzu Əliyeva film haqqında öz təəssüratları ilə bölüşərək, bu filmin bölgələrdə və məktəblərdə yayımlanması təklifini irəli sürüblər.
Tədbirin sonunda Layihənin rəhbəri Gəray Əlibəyov layihəyə maliyyə dəstəyi göstərən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə və tədbir iştirakşılarına öz təşəkkürünü bildirib.
“Ədəbiyyat və incəsənət”
(09.10.2023)
