İnci Məmmədzadə, “Ədəbiyyat və incəsənət”
Azərbaycanın milli qəhrəmanları…
Hər biri barədə cild-cild kitablar yazılsa belə azdır.
Baş leytenant Eldar Məmmədov 1968-ci il 10 yanvar tarixində Bakı şəhərində doğulmuşdur. Cəmşid Naxçıvanski adına hərbi liseyi bitirdikdən sonra 1985–1989-cu illərdə Riqa Ali Hərbi Siyasi Məktəbdə təhsil almışdır.
1989–1991-ci illərdə Rusiyanın Orenburq vilayətində zabit kimi hərbi xidmətdə olmuşdur. O, Azərbaycana qayıtdıqdan sonra əvvəl raket qoşunlarında, sonra isə Milli Təhlükəsizlik Nazirliyi Sərhəd Qoşunları Baş İdarəsində hərbçi kimi fəaliyyətini davam etdirmişdir.
Ağdərədə gedən döyüşlərdə xüsusi fədakarlıq nümayiş etdirmiş, 1993-cü il 24 fevral tarixində qəhrəmancasına həlak olmuşdur.
Azərbaycan Milli Qəhrəmanı adına layiq görülmüşdür, Dövlət Sərhəd Xidmətinin Göytəpə Sərhəd Dəstəsinin N saylı sərhəd–keçid məntəqəsi onun adını daşıyır.
Allah rəhmət eləsin!
Amin!
Daxili Qoşunların leytenantı Fəxrəddin Nəcəfov 1967-ci il mart ayının 31-də Bakı şəhərində doğulmuşdur. 1984-cü ildə Bakı şəhərinin Nəsimi rayonundakı 19 nömrəli orta məktəbi bitirmişdir. 1985–1987-ci illərdə Rusiyanın Arxangelsk vilayətində hərbi xidmətdə olmuşdur.
1991-ci ildə könüllü olaraq Qarabağ cəbhəsinə yollanmış, 1992-ci ildə Ağdam cəbhəsində hərbi hissələrdən birinin komandiri təyin edilmişdir. 1992-ci il sentyabr ayının 4-də Ağdərənin Çıldıran kəndi uğrunda gedən döyüşlərdə qəhrəmancasına həlak olmuşdur.
6 noyabrda ona Azərbaycan Milli Qəhrəmanı adı verilmişdir.
Azərbaycanın qəhrəman oğlu Şəhidlər Xiyabanında dəfn edilmişdir. Bakı şəhəri 266 nömrəli tam orta məktəb onun adını daşıyır.
Allah rəhmət eləsin!
Amin!
“Ədəbiyyat və incəsənət”
(10.01.2025)
