Qəbələ “Qış nağılı” Beynəlxalq Musiqi Festivalının proqramına uyğun olaraq, fevralın 8-də Qəbələ Mədəniyyət Mərkəzində Bakı Xoreoqrafiya Akademiyasının şagird və tələbələrinin iştirakı ilə növbəti konsert proqramı təqdim olunub.

“Ədəbiyyat və incəsənət” portalı AzərTAC-a istinadən xəbər verir ki, konsertdən əvvəl Üzeyir Hacıbəyli adına Bakı Musiqi Akademiyasının professoru, Xalq artisti Zəhra Quliyeva çıxış edərək balet janrının tarixi barədə qısa məlumat verib.

Bakı Xoreoqrafiya Akademiyasının tədris işləri üzrə prorektoru, rektor vəzifəsini müvəqqəti icra edən, Əməkdar artist Nailə Məmmədzadə deyib: “Qəbələ şəhərində keçirilən festivalda ilk dəfədir çıxış edirik. Çox həyəcanlıyıq. Bakı Xoreoqrafiya Akademiyasının “Qış nağılı” festivalına öz hədiyyəsi var. Biz çox çalışdıq. Ümid edirik ki, konsertimiz tamaşaçıların xoşuna gələcək”.

Konsertdə akademiyanın şagird və tələbələrinin ifa etdikləri Ü.Hacıbəylinin “Koroğlu” operasından “Qızların rəqsi”, “Cəngi”, P.İ.Çaykovskinin “Şelkunçik” baletindən vals, Şəkər pərisinin variasiyası, S.Hacıbəyovun “Karvan” simfonik lövhəsi, Niyazinin “Qaytağı”, F.Əmirovun “Azərbaycan kapriççiosu”ndan fraqment, Q.Qarayevin “Yeddi gözəl” baletindən “Lirik rəqs”, “Adagio”, “Gözəllər gözəlinin rəqsi” və digər xoreoqrafik kompozisiyalar, gürcü, özbək rəqsləri tamaşaçılar tərəfindən böyük maraqla qarşılanıb.

“Ədəbiyyat və incəsənət”

(10.02.2025)