Səbinə Yusif, “Ədəbiyyat və incəsənət” üçün
Azərbaycan Dillər Universitetində (ADU) Azərbaycan Ədəbiyyatı kafedrası, Multikulturalizm Mərkəzi və “Azərbaycanşünaslıq” Elmi Mərkəzinin təşkilatçılığı ilə “Səməd Vurğun yaradıcılığında bəşəri duyğular” mövzusunda dəyirmi masa keçirilib.
Multikulturalizm Mərkəzinin müdiri Loğman Rəşidzadənin moderatorluğu ilə keçən dəyirmi masada Səməd Vurğunun həyatı, yaradıcılığı, yaşadığı dövr və fəaliyyəti haqqında geniş müzakirələr aparılıb.
Tədbiri açan ADU-nun Elm və innovasiya məsələləri üzrə prorektoru Həmidə Əliyeva Səməd Vurğunun Azərbaycan ədəbiyyatındakı rolu və xidmətləri haqqında danışıb.
“Qazax” Xeyriyyə İctimai Birliyinin üzvləri də tədbirdə geniş şəkildə təmsil olunaraq təşkilati dəstək göstəriblər.
“Qazax” Xeyriyyə İctimai Birliyinin üzvü, hərbi jurnalist, Prezidentin fərdi təqaüdçüsü Şəmistan Nəzirli şairin yaradıcılığı ilə bağlı apardığı tədqiqatlardan söz açıb və yeni çap olunmuş, Səməd Vurğun haqqında faktlarla zənginləşdirilmiş “Vurğun keçib bu yerlərdən” kitabını tədbir iştirakçılarına təqdim edib.
Azərbaycan Milli Elmlər Akademiyasının Ədəbiyyat İnstitutunun elmi işçisi, Vurğunşünas Aslan Salmansoy da şairin ədəbi irsi ilə bağlı tədqiqatlarını bölüşüb, ona qarşı yönələn tənqidləri elmi şəkildə təkzib eləyib.
Azərbaycan Ədəbiyyat Fondunun Baş direktoru, yazıçı Varis isə Səməd Vurğun poeziyasının özəlliklərindən danışaraq, onun Azərbaycan ədəbiyyatında yeni dövrün əsaslarını qoyduğunu vurğulauıb. Varis tədbir iştirakçılarına Xalq yazıçısı Anarın yeni çapdan çıxmış “2=3+4, yaxud iki ailədə üç Xalq yazıçısı, dörd Xalq şairi” adlı kitabını təqdim edib. Kitabda Azərbaycan ədəbiyyatı irsinə böyük töhfələr vermiş iki nəsildən - Səməd Vurğun və Rəsul Rzanın ailəsinin istedadlı üzvlərinin həyat və yaradıcılığından, onlar barədə həqiqətlərdən və onların ədəbi nümunələrindən bəhs edilir.
Şairin nəticəsi, Səməd Vurğunun Ev muzeyinin direktoru Vurğun Vəkilov çıxış edərək tədbirin təşkilatçılarına və iştirakçılara minnətdarlığını bildirib, Vurğunsevərləri muzeyə dəvət edib.
Filologiya fakültəsinin tələbələri Mətanət Şükürova və Fatma Rəsulova şairin “Mən tələsmirəm” və “Şair, nə tez qocaldın, sən” şeirlərini söylədilər.
“Qazax” Xeyriyyə İctimai Birliyinin üzvü, neftçi-şair Hacı Zaməddin Ziyadoğlu Səməd Vurğun yaradıcılığından söz açpb. Səməd Vurğuna həsr etdiyi “Vurğuna Vurğun gəlin” dramı haqqında tədbir iştirakçılarına məlumat verib.
Fərman Borçalı Səməd Vurğun yaradıcılığında insani keyfiyyətlərdən, bəşəri dəyərlərdən danışpb. Şairin şeirini səsləndirib.
“Qazax” Xeyriyyə İctimai Birliyinin üzvü, şair Rafail İncəyurd tədbirin iştirakçılarına “Qazax” Xeyriyyə İctimai Birliyi İdarə heyətinin sədri, professor İlham Pirməmmədovun salamlarını çatdırıb. Tədbir iştirakçılarına Səməd Vurğunun növbəti doğum günü ilə əlaqədar olaraq keçiriləcək tədbirlərə dəvət edub,
Tədbirin sonunda aşıqlar Sənan İncəli və İsmayıl İncəli Səməd Vurğunun “Azərbaycan” şeirini ifa ediblər.
“Ədəbiyyat və incəsənət”
(22.03.2025)
