Nemət Tahir,

“Ədəbiyyat və incəsənət” portalının Qarabağ təmsilçisi

Kiçik biznes sahibi olan bir gənc görkəmli bankir-biznesmen, milyonçu Con Pirpoynt Morqana (1837-1913) məktub göndərib, ona 10 dəqiqə vaxt ayırmağı xahiş edir və hər dəfə rədd cavabı alır. Sonra o 5 dəqiqəlik görüş xahiş edir və yenə də rədd cavabı alır, çünki Morqan yalnız iri biznesmenlər və maliyyə maqnatları ilə işbirliyinə gedirdi.

İnadkar gənc yenidən məktub yazır:

"Bankınızın qapısından maşına qədər sərf etdiyiniz vaxtı mənim üçün ayırın."

Bu dəfə Morqan razılaşır. Təyin olunmuş vaxtda gənc "Uoll-strit bossu"nu qapıda qarşılayır, özünü təqdim edir və bir kəlmə söz demədən maşına tərəf addımlayır. Maşına çatdıqdan sonra Morqan təəccüblə soruşur:

- Siz düz bir il mənimlə görüşməyə can atmısınız, indi niyə susursunuz?

Gənc biznesmen cavab verir:

- Mənə sizinlə yanaşı getmək kifayətdi. Bu dəqiqədən etibarən bütün Uoll-strit bizim birgə getməyimizdən, mənim sizə yaxınlığımdan danışacaq. Deməli, istənilən bank mənə həvəslə kredit verəcək.

 “Ədəbiyyat və incəsənət”

(21.10.2026)