İnci Məmmədzadə,

“Ədəbiyyat və incəsənət” portalının Xəbərlər və Təqvim şöbəsi

Xüsusilə qorxu, fantastika, mistika, psixoloji triller və fövqəltəbii ədəbiyyat sahəsində dünyanın ən tanınmış yazıçılarından biridir Stiven Kinq (Stephen King). Azərbaycanda da çox oxunur.

Bu gün doğum günüdür, 79 yaşı tamam olur və o, 80-in yoluna qədəm qoyur.

Kinq 21 sentyabr 1947-ci ildə ABŞ-ın Men ştatının Portlend şəhərində anadan olub, tərcümeyi-halında sənəti yazıçı, ssenarist və esseist kimi göstərilir.

Kinqin uşaqlığı asan keçməyib. Atası Donald King o, hələ çox kiçik yaşda ikən ailəni tərk edib və Stiven əsasən anası Nellie Ruth King tərəfindən böyüdülüb. Ailə maddi çətinliklərlə üzləşib və müxtəlif yerlərdə yaşayıb.

Kinq hələ uşaq yaşlarından hekayələr yazmağa maraq göstərirdi. Komikslər, qorxu hekayələri və fantastik əsərlər onun yaradıcılıq dünyasına ciddi təsir göstərib. Məktəb illərində öz yazdığı hekayələri dostlarına və tanışlarına satdığı da məlumdur.

Daha sonra Men Universitetində təhsil alıb və 1970-ci ildə ingilis dili üzrə məzun olub. Müəllimlik edib, eyni zamanda yazıçılıqla məşğul olub. Stiven Kinqin ilk böyük uğuru “Carrie” romanı ilə bağlıdır. Əsər 1974-cü ildə nəşr olunub.

Roman teleginetik qabiliyyətlərə malik olan və məktəbdə həmyaşıdları tərəfindən təzyiqə məruz qalan Kerri Uayt adlı yeniyetmə qızdan bəhs edir. “Carrie” Kinqi qısa müddətdə tanınmış yazıçıya çevirib. Əsərin uğurundan sonra onun ard-arda romanları nəşr olunmağa başlayıb

Stiven Kinq çox məhsuldar yazıçıdır. Onun ən məşhur əsərləri arasında:

- Carrie

- 'Salem's Lot

- The Shining

- The Stand

- The Dead Zone

- Cujo

- Pet Sematary

- It

- Misery

- The Green Mile

- The Dark Tower seriyası

- 11/22/63

- Doctor Sleep

- The Institute

- Billy Summers

- Fairy Tale

xüsusi yer tutur.

“The Shining” Kinqin ən məşhur romanlarından biridir. 1977-ci ildə nəşr olunan əsərdə Cek Torrance adlı yazıçı ailəsi ilə birlikdə ucqar bir otelə gedir. Oteldə baş verən fövqəltəbii hadisələr onun psixoloji vəziyyətinə təsir göstərməyə başlayır. Əsər sonradan rejissor Stenli Kubrik tərəfindən məşhur filmə uyğunlaşdırılıb. Baş rolda Cek Nikolson çıxış edib.

 1986-cı ildə yayımlanan “It” romanı Kinqin ən tanınmış əsərlərindən biridir. Əsərin mərkəzində uşaqları qorxudan və müxtəlif formalara girə bilən fövqəltəbii varlıq dayanır. Ən məşhur obrazı Pennywise adlı kloundur. Roman yalnız qorxu haqqında deyil. Uşaqlıq, dostluq, travma, qorxu və insanın keçmişi ilə üzləşməsi kimi mövzular da əsərdə mühüm yer tutur.

“Misery” romanında məşhur yazıçı Pol Şeldon avtomobil qəzasına düşür və Enni Vilks adlı qadın tərəfindən xilas edilir. Lakin tezliklə məlum olur ki, Enni yazıçının böyük pərəstişkarıdır və onu öz iradəsinə tabe etməyə başlayır. Bu əsərdə Kinq fövqəltəbii qorxudan çox psixoloji gərginlikdən istifadə edir.

“The Green Mile” Kinqin ən emosional əsərlərindən biridir. Hadisələr ölüm hökmü verilmiş məhbusların saxlanıldığı həbsxananın xüsusi bölməsində baş verir. Əsərdə Con Koffi adlı qeyri-adi məhbus mühüm yer tutur. Əsər 1999-cu ildə filmə uyğunlaşdırılıb və Tom Henksin baş rolda oynadığı ekran əsəri böyük uğur qazanıb

Stiven Kinqin əsərləri əsasında çoxsaylı filmlər və seriallar çəkilib. Məşhur ekranlaşdırmalar arasında:

1. The Shining

2. Carrie

3. It

4. It Chapter Two

5. Misery

6. The Green Mile

7. The Shawshank Redemption

8. Stand by Me

9. The Mist

10. Doctor Sleep

11. 1408

12. Pet Sematary

var.

Xüsusilə dünyanın ən kassalı filmlərindən olan “The Shawshank Redemption” (“Şouşenkdən qaçış”) filmi Kinqin “Rita Hayworth and Shawshank Redemption” (“Rita Heyvort və Şouşenkdən qaçış”) adlı əsəri əsasında hazırlanıb və kino tarixinin ən məşhur filmlərindən birinə çevrilib.

“Ədəbiyyat və incəsənət”

(21.09.2026)