“Diaspor TV”nin çəkiliş qrupu Ər-Riyad şəhərində  yaşayan və Səudiyyə Ərəbistanının NEOM meqalayihəsində çalışan soydaşımız Sevinc Qurbanova ilə görüşüb. O, nəhəng layihənin mahiyyəti haqqında fikirlərini bölüşüb və bu böyük inkişafa qoşulmaqdan qürur duyduğunu ifadə edib.

Soydaşımız qeyd edib ki, NEOM layihəsi təkcə texnologiya və infrastruktur cəhətdən deyil, həm də insanların həyat tərzini dəyişmək baxımından mühüm bir yenilikdir.

“Ədəbiyyat və incəsənət” portalına Diasporla İş üzrə Dövlət Komitəsindən verilən məlumata görə, Sevinc Qurbanova 2 ildir ki, Səudiyyə Ərəbistanı Krallığında yaşayır. 2021-ci ildən NEOM layihəsində mütəxəssis vəzifəsində çalışır. Bundan öncə Dubayda liman sahəsində çalışan soydaşımız əvvəllər Azərbaycanda neft-qaz sektorunda fəaliyyət göstərib.

NEOM Səudiyyə Ərəbistanının inşa etməyi planlaşdırdığı yüksək texnologiyalı ağıllı şəhər layihəsidir. "Xəyalpərəstlər şəhəri" adlandırılan NEOM şəhər həyatını yenidən formalaşdırmağı, innovasiya, dayanıqlılıq və texnologiya üçün qlobal bir mərkəz yaratmağı hədəfləyir. NEOM-un ilk hissəsinin 2025-ci ilə qədər tamamlanması və ənənəvi investisiyalardan uzaq, tamamilə ekoloji və innovativ enerji mənbələri ilə işləyən şəhər olması nəzərdə tutulur. Yeni layihənin sərmayəçilərə 500 milyard dollardan çox gəlir gətirəcəyi barədə fikirlər səslənir.

Soydaşımızın müsahibəsini aşağıdakı linkə keçid edərək izləyə bilərsiniz:

https://www.youtube.com/watch?v=53_GeT-QqnI

“Ədəbiyyat və incəsənət”

(13.06.2025)