Ülviyyə Əbülfəzqızı,

“Ədəbiyyat və incəsənət” portalının Xüsusi Layihələr şöbəsi

Salam, "Ədəbiyyat və İncəsənət" portalının sevimli izləyiciləri, xoş gördük.

"Bir şair, bir şeir" rubrikamız yenə də gözəl bir poeziya nümunəsi ilə ruhunuzu oxşayacaq.

Beləliklə, Sizə filoloq şair Gülnarə Sadiqin "Bir qadının ahı" adlı şeirini təqdim edirik.

Kaş ki qadınlar heç ah çəkməyəydi.

GÜLNARƏ SADİQ

BİR QADININ AHI

Bəlkə də bu gün,

bilmirəm,

Bəlkə min il öncə?!

Dünyada nəyinsə sınan günü.

hardasa bir küncdə,

bir qadının göz yaşı sındırıb

bu dünyanın ədalətini?

Bir qadının son ümidi

məhv edib vicdanı?

​Bilirəm,

indi susmaq dəbdir,

Kişilər susur,

Qadınlar içindən boğulur,

sevgilər çökür,

tənhalıq hakimiyyətə gəlir...

Ürəyi yanır dünyanın,

Vücudunu dərd bürüyüb –

Bir qadının həsrəti qədər.

Deyəsən, hardasa

dünyanın bir küncündə -

Bir qadının ahı tutup insanlığı...

“Ədəbiyyat və incəsənət”

(13.10.2026)