Kənan Məmmədli,

“Ədəbiyyat və incəsənət” portalının Xəbərlər və Təqvim şöbəsi

Ədəbiyyatsevərlərin sevimli dərgisi “Ulduz”un iyul-avqust sayı işıq üzü görüb. Dərginin baş redaktoru, sevilən şairimiz Qulu Ağsəslə əlaqə saxlayıb dərginin yay sayında gedən  yazılar barədə bilgi aldıq.

Həmişə olduğu kimi bu dəfə də dərgi öz oxucuları ilə bir-birindən maraqlı yazılarla gəlib. Qulu Ağsəs “Bircə kəlmə: Hicran”, TəranəVahid  “Yaşıl elegiya” yazıları ilə jurnalın mərhum şöbə redaktoru, yazıçı-publisist Hicran Hüseynovanı yad edirlər.

“Şeir vaxtı”nda  Həmid Herisçi, Seyyidəli Sübhi, Cavid Fərzəli, Zaman Piriyev, Şəfəq Sahibli və Zaur Ərmuğandır.

“Nəsr” Nemət Mətinin “Zəlzələ”, Əli Bağışın “Dörd tabut”, Əli bəy Azərinin “Messi”, Sadiq Qarayevin “Çalası” hekayələrini təqdim edir.

Oxucular “Tərcümə saatı”nda çeçen yazıçısı  Səid-Həsən Katsayevin “Qaranlıqda” hekayəsini Seyfəddin Hüseynlinin tərcüməsində oxuya bilərlər.

“Beş əsrdir yaşayan dahi: Şekspir haqqında bilinməyən 15 fakt”ı gənc ingilis ədəbiyyatı mütəxəssisi Alsu araşdırıb.

“Ədəbi fraqmentlər”də  “Şəhidlər – Qəhrəmanlar” yazısı ilə Vaqif Yusiflidir.

İlahə Səfərzadənin “Məti Osmanoğluyla tamamlanmamış söhbət”i, Anar Seyidağanın, İbrahim Yusifoğlunun, Qəhrəman Kamiloğlunun  şeirləri, Qalib Arifin hekayəsi də bu nömrənin oxunaqlı yazılarındandır.

“Dərgidə kitab” Hafiz Ataxanlının “Varlıq və yoxluq” fantasmaqorik povestini təqdim edir.

“Dərgidə sərgi”də rəsm əsərləri ilə  Məryəm Məmmədzadədir.

İstəkli oxucular, “Ulduz”u əldə edin, oxuyun, zövq alın.

“Ədəbiyyat və incəsənət”

(19.08.2026)