Habil Yaşar,
“Ədəbiyyat və incəsənət” portalının Ədəbiyyat şöbəsi
Təqdimatımız bu dəfə də Güney Azərbaycana köklənibdir. İsa Zeyni 1982-ci ildə Xiyov (Meşginşəhr) şəhərində anadan olub. Uşaqlıq illərindən şeirə və ədəbiyyata böyük maraq göstərib, bədii yaradıcılıqla məşğul olub. Müxtəlif ədəbi dərgilərdə və toplularda şeirləri dərc edilib.
2025-ci ildə Zaman Paşazadə ilə birlikdə tərcümə etdiyi “Alt şifri şeir” adlı kitabı işıq üzü görüb
Qəfil Qadın
Sən
Həyatını ssenarilərə deyil,
ssenariləri həyatına keçirdin..!
Güzgülərdə gözəlliyinin gündəminə dalıb, kürtaj etdin ürəyini.
Və Kör kameralar önündə boşuna dəyişdin həyatını
E... E... Ey qaldırımların qəfil qadını!
Əski romanlardan xortlamış
hansı uğursuz xarakter,
və yanlış anlayışlarda qabıq qoyacaq hansı ikihecalı sözcüksən?!
Bunca vitrinləşmədə;
bütün saxlancalar basılır,
bir anda
Əndamına çökür qələbəlik!
Eniş
yoxuş,
hadisə,
həyəcan...!!!
Amma sən!
Sərhədləri pozulmuş bir iqlim!
Matadorlar kəməndinə tuş olmuş ləhləyən bir ov!
Və gözəlliyi tikanlı yataqlarda suluqlayan bir ehtiyac!
Həyatının şifrəsini duydular.
Adını nə isə... qoydular!
Para-para paralandın...
E... E... Ey qadın!!!
GizlinPaç
Gizlin paç oynayırıq
sən,
mən,
birdə ki Tanrı!
Öncə Tanrı yumdu gözlərini,
və biz sevişdik...
gizlicə!
Sonra sən yumdun gözlərini,
Tanrı ilə mən savaşdıq...
gizlicə!
Amma mən
heç zaman yummayacağam
gözlərimi...
Bu gün uzaqlarda mürgüləyirəm qurbətimi...
Yalqız və kədərli.
Tam uzun gecələr ürəyimə hoparkən,
bac alır gözlərimdən.
Və kefli bir şaxta dartınır fəsillərimə.
Mən isə,
kal duyğuları tamsınıb,
bayat xatirələri udqunuram.
Yalnız
özümü əprimiş yollara acıqlanıram...
Oooy!
Ucuzluğumdakı ömür laxtası!
Necə keçindin məni bu susqunluqda?!
Yoxsa alnımın pozğun yazısıdır oxunan?
Yoxsa pəltəkdir boğazımdakı bu çığırtı?
Yoxsa qara qarğışdır
o qızın saçlarını sovuran?!
Ah... o qız!
Bir görüş ertəsi vuruldum.
Kəndimi kəndinə bağladım,
duydum yaramazlığı utandım.
Sonra seyrək baxışlarından sıyrılaraq
adaxlandım ayrılığa.
İndi isə;
Acığım gəlir gecənin susqunluğundan!
Acığım gəlir bütün çıxmaz küçələrdən!
Acığım gəlir həyətimizdə döyüşən iki yad beçədən!
Acığım gəlir...
Acığım gəlir.
“Ədəbiyyat və incəsənət”
(15.07.2026)
