Azərbaycan Ədəbiyyat Fondunun “Yazıçı” nəşriyyatında Xalq yazıçısı Anarın “2=3+4, yaxud iki ailədə üç Xalq yazıçısı, dörd Xalq şairi” adlı kitabı işıq üzü görüb. Nəfis tərtibatlı, illüstrasiyalı kitab Azərbaycan ədəbiyyatı irsinə böyük töhfələr vermiş iki nəsildən, onlar barədə həqiqətlərdən və onların ədəbi nümunələrindən ibarətdir.
608 səhifəlik bu unikal kitabı tərtib edən Xalq yazıçısı Anar uzun illər ərzində təkcə öz yazdıqlarını yox, qəhrəmanlarının – Səməd Vurğun, Rəsul Rza, Nigar Rəfibəyli, Vaqif Səmədoğlu, Ənvər Məmmədxanlı və Yusif Səmədoğlunun yazdıqlarını eyni ideya-estetik yaradıcılıq məcrasına qoşaraq, onları eyni axında birləşdirərək ən yeni ədəbiyyatın ən milli paradiqması olaraq təqdim edibdir.
“Ədəbiyyat və incəsənət” portalı kitabdan hissələri oxucularına təqdim edir. Anar qəhrəmanlarının ən populyar əsərlərini bir daha yaddaşlarda təzələyir:
ANAR, ŞEİRLƏR
ÜRƏK QATARI
Atamın yaşını ötəndə onun “Yol. Qatar” şeirini ayrı gözlə oxudum
O gün exoqrammada
Dinlədim ürəyimi.
Eynən qatar səsiydi
Relslər üstə
çık-çırık… çık…çırık…çık…çırık…
harasa tələsirdi.
Duraqlarda durmadan
Hey irəli, irəli
qatar gedirdi hara?
Haçan çatacaq ora?
Hələ ana bətnində
Yollara çıxır “qatar”,
Sonra dünyaya gəlir,
Davam edir bu səfər
Hər axşam, gecə, səhər.
Keçib gedir, ötüşür,
dəyişir pəncərələr
Həftələr, aylar, illər…
Keçir gənclik, qocalıq,
Sona az qalır artıq.
Pillələri qalxanda qatar bir az töyşüyür,
Bir az yeyin döyünür.
Bədxahlığı görəndə istidə də üşüyür.
Sonuncu duraq – sükut
Gəlib ora çatanda
bir anda
çık-çırık dayananda
Susacaqdır qatarın
relslərdə döyüntüsü
Başlanacaq əbədi
səssizlik-səmirsizlik.
Bu yolun gerisi yox,
Amma hələ ki, gedir,
hələ yoldadır qatar,
Şükür,
dayanmır qatar.
Son durağa bir az var…
Darıxmayın,
bir az var
Saniyələr, saatlar,
Yenə tələsir, qaçır
Yenə də axşam düşür,
yenə də şər qarışır.
Külək səndən söz açır,
Yağış səndən danışır.
Zamanın təkərini
necə geri döndərim?
Yadımda qalanları
sənə necə göndərim?
Sənsiz kimdi, əzizim
Məni tanıyan, sayan,
Söhbətimi, sözümü
Bütün aləmə yayan?
Ay batanda ağlayıb,
Gün çıxanda gülürsən.
Dünyanı gah bağlayıb,
Gah açmağı bilirsən.
Dənizləri örtəndə
buludların kölgəsi
Ayla başlayacaqdır
dənizin qabarması,
dənizin çəkilməsi.
Ayla, günlə nə işim,
tək səninlə bağlıdır
könlümün hər kəlməsi.
25 yanvar 2015
“Ədəbiyyat və incəsənət”
(06.10.2025)
