Harun Soltanov, “Ədəbiyyat və incəsənət”

"Pünhan" gizli deməkdir. Kitabının adı isə "Aşikar"" - K. Ağabalayev

Elmlər Akademiyasında yerləşən "Libraff" kitab evində şair Pünhan Əzimov Alatavalının "Aşikar" kitabının təqdimat mərasimi keçirildi. Tədbir səmimi və emosional ovqatı ilə seçildi, poeziyanın ruhu iştirakçıların qəlbinə sirayət etdi.

Tədbirdə 100-150 nəfərə yaxın poeziyasevər iştirak edirdi. Onların arasında Səbuhi Xırdalanlı, Kamran Ağabalayev, Rəşad Mikayılzadə, eləcə də aktrisa Günəş Tegin kimi tanınmış simalar yer alırdı. Media nümayəndələri, ədəbiyyat həvəskarları və müxtəlif sahələrdən gəlmiş qonaqlar tədbirin ab-havasına xüsusi rəng qatdılar. Portal dostumuz Nail Zeyniyev də qonaqlar arasında idi.

Təqdimatda səslənən qəzəllər, səhnəyə sanki qeyri-adi bir sehri gətirdi. Qonaqlar böyük diqqətlə şairin söz dünyasına səyahət etdi, ruhlarının dərinliklərinə doğru bir yol aldı. Tədbirin ən təsirli məqamlarından biri, qəzəllərin səsləndirildiyi anlardı. Sözlər, zamanın ritmini dəyişdi, məkanın sərhədlərini aşdı. Hər kəs bir anlıq susdu, dinlədi, içindəki duyğulara qulaq verdi. Sanki illərlə axtarılan bir səs, bir söz tapılmışdı. Bu anlar, təqdimatı adi bir tədbirdən çıxarıb, unudulmaz bir poeziya axşamına çevirdi.

Tədbir boyu iştirakçılar tərəfindən Pünhan Əzimova maraqlı suallar ünvanlandı. Şair qəzəl yazmaq prosesindən danışdı və poetik yaradıcılığının sirlərini bölüşdü. Onun sözlərinə görə, qəzəlləri yazmaq üçün özünə suallar verir, bu suallara cavab axtararkən sözlər içində bir məna dünyası qurur. Qəzəllərini sakit kabinetlərdə deyil, məclislərdə, səfərlərdə, həyatın təbii axarında yazdığını vurğuladı. Bu yanaşma onun şeiriyyətinə həm canlılıq, həm də ruh dərinliyi bəxş edir.

Pünhan Əzimovun "Aşikar" kitabı məhz bu duyğuların, bu sualların və iç səsin poetik cavabıdır. Kitab şairin müxtəlif zamanlarda yazdığı qəzəllərdən ibarətdir və hər bir qəzəl ayrı-ayrılıqda bir könül hekayəsi, bir ruh pəncərəsidir.

Tədbir zamanı Pünhan Əzimov kitaba toplanmış qəzəlləri imzaladı və qonaqlara hədiyyə etdi. İmzalanma anı isə tədbirin başqa bir emosional zirvəsi oldu: hər bir kitab, bir təşəkkür, bir dua, bir dua kimi iştirakçıların qəlbinə toxundu.

Təqdimatda həmçinin Azərbaycan ədəbiyyatının klassiklərinə ehtiram göstərildi. Elecə də azərbaycanlı şair  Sailin köhnə qəzəllərini yenidən işıq üzü görmək niyyəti tədbirin unudulmaz məqamlarından biri oldu. Tapdığı iki qəzəlin birini də bizim üçün səsləndirdi.  Şair Mövlananın kəlamlarına da istinad etdi və tədbir boyu sözə, hikmətə sığal çəkən fikirlər səsləndirildi. Pünhan Əzimovun "İnsana təşəkkür etməyən, Allaha şükür edə bilməz" fikri tədbirin ümumi ruhunu ifadə edən ən təsirli cümlələrdən biri oldu.

Tədbirin sonunda hiss olunurdu ki, bu təqdimat sadəcə bir kitabın təqdimatı deyil, eyni zamanda sözə, könülə, duyğuya bir səcdə idi. Burada hər kəs bir anlıq öz iç səsini dinlədi, susdu və poeziyanın sehrində azıb getdi.

Ən gözəl sözlər, susqun qəlblərə toxunanlardır. "Aşikar" bu toxunuşun səmimi təcəssümüdür.

Belə tədbirlər bir daha göstərir ki, sözlər, yalnız yazılmaq üçün deyil, yaşanmaq üçün var. "Aşikar" təqdimatı, sanki bir kitabın səhifələrindən yox, insanın qəlbindən doğan bir əhvalat idi. Pünhan Əzimovun qəzəlləri, içindəki sonsuz sualları və axtarışları bizə sadəcə sözlərin möcüzəsini deyil, insanın özünü tapmaq yolundakı həqiqəti də göstərdi.

Bəlkə də ədəbiyyat, hər bir oxucuya yalnız gözlə görünənləri deyil, eyni zamanda görünməyənləri göstərən bir gücdür. Bu güc, hər misrada bir dünya, hər sətirdə bir həyat doğurur. Pünhanın yaratdığı dünyada biz yalnız onun sözlərinə qulaq asmırıq, həm də içimizdəki ən dərin hisslərə toxunuruq.

Bu an, bir kitabın təqdimatı deyil, insanın özünü kəşf etdiyi, içindəki əks-sədaları tapdığı bir an oldu. Pünhan Əzimova yalnız bu kitabı ilə deyil, bütün yaradıcılığı ilə insanın özünü və dünyanı daha dərindən anlaması yolunda yeni bir qığılcım olmağı arzulayırıq. Onun qələmindən çıxan hər bir misra, bəlkə də bir çoxlarımız üçün həyatın, zamanın və varlığın mənasını daha aydın görməyə kömək edəcək.

Yeni əsərləri və gələcək yaradıcılığı, sadəcə kitablar deyil, bizə dünyanı və insanı bir az daha başa düşmək üçün bir fürsət verəcək.

Hər bir yaradıcılıq uğuru, onun sözlərindən ilham alaraq daha çox insanın ruhunu oyandırsın. Pünhan Əzimova yolunun hər addımında yeni uğurlar və sonsuz ilhamlar diləyirik. Poeziyanın və insanın dərinliyinə doğru yeni kəşflərlə dolu bir yolun olsun!

“Ədəbiyyat və incəsənət”

(30.04.2025)