İnci Məmmədzadə, “Ədəbiyyat və incəsənət”

Azman bəstəkarlarımız indi çox azdır. Eldar Mansurov, Siyavuş Kərimi, Faiq Sücəddinov...

Azərbaycan bəstəkarı, Azərbaycan Respublikasının xalq artisti Faiq Sücəddinov 14 iyun 1947-ci ildə anadan olub. Özü də ulu Gəncədə.

Və demək ki, onun boş yerə adını çəkmirik, bu gün onun doğum günüdür.

1965-ci ildə Faiq Sücəddinov Asəf Zeynallı adına Musiqi Texnikumunun fortepiano şöbəsinə daxil olub.

Azərbaycan Dövlət Radio və Televiziya Komitəsinin Estrada Orkestrinin rəhbəri Tofiq Əhmədovun dəvətilə orkestrdə çalışmağa başlayıb. 1980-ci illərdə Faiq Sücəddinov Estrada Orkestrində fəaliyyətini dayandırıb və Azərbaycan Pedaqoji Dillər İnstitutunda təhsilini davam etdirib.

Əsərləri arasında piano və simfonik orkestr üçün konsert, simli kvartet, piano və kamera orkestri üçün konsert, kamera orkestri üçün skertso, xor və simfonik orkestr üçün "Atatürk" odası müxtəlif tərkibli ansambllar üçün caz kompozisiyaları vardır.

Faiq Sücəddinov İkinci Qarabağ müharibəsi və Zəfər Günü mövzusunda "Zəfər" simfonik poeması, "Şuşa" oratoriyası və "Qarabağnamə" simfonik balladasının müəllifidir.

14 sentyabr 2015-ci ildə Azərbaycan Respublikası Prezidentinin fərdi təqaüdünə layiq görülüb. "Şöhrət" ordeni və  "Heydər Əliyevin 100 illiyi" yubiley medalı ilə təltif olunub.

Filmoteka

1. Aşkarsızlıq şəraitində...

2. Bir anın həqiqəti 

3. Bahar oğlu 

4. Balqabaq 

5. Qovğalı kəndinin gecələri

6. Dalan

7. Ömür payı. Səməndər Rzayev 

8. Portret... Bəstəkar Faiq Sücəddinov 

“Ədəbiyyat və incəsənət”

(14.06.2025)