Ədəbiyyat və incəsənət” portalının 1 şair, 1 şeir rubrikasında bu gün Reyhan Kənanın “Yamaq” şeiri təqdim edilir.

Reyhan Kənan Azərbaycan Yazıçılar Birliyinin üzvü, şair-publisistdir.

Yamaq

Düşüncələrim - cuvalı

Cırılmış buğda dənəsi,

Dağılır, süzülür boşalır yerə.

Özüm də bilmirəm məndən

Xəbərsiz hara yola düşür, 

baş alır yenə? 

Nə iynə tapıram, nə sap,

nə üskük.

Birini tapsam da, o biri əskik.

Qoçaqsan iynəsiz, 

həm də ki sapsız 

dağılan fikirlər çuvalını tik.

Külək də bu yandan qənimdir mənə,

Qəsdi fikirləri oğurlamaqdı.

Hansı tikiş vurum mən bu çuvala, 

Nə etsəm onsuz da adı yamaqdı!? 

Eybi yox, dağılan buğda dənləri

“ac olan quşlar”ın gərəyi olar.

Mənim deyilməyən düşüncələrim, 

Deyilən sözlərin ürəyi olar.

“Ədəbiyyat və incəsənət”

(20.10.2025)