“Ədəbiyyat və incəsənət” portalının Redaksiyanın Poçtundan rubrikasında bu gün Azərbaycan Yazıçılar Birliyinin üzvü Coşqun Xəliloğlunun bir şeiri təqdim edilir.

SALAM ALLAH SALAMIDIR

Unutma, saxla yadında,

Salam Allah salamıdır.

Dua, "barışıq" adında-

Salam Allah salamıdır.

Önu söyləmək savabdır,

Sözdür- yükü bir kitabdır.

Neçə suala cavabdır,

Salam Allah salamıdır.

O söz qəlbi sevindirər,

Nifrəti, kini söndürər.

Dilsizləri də dindirər,

Salam Allah salamıdır.

Böyüyüb dolursan yaşa,

Dünya sirli bir tamaşa.

Salam ver dosta- sirdaşa,

Salam Allah salamıdır.

Salamsız-kəlamsız olsan,

Deyəcəklər, “Bala, "kalsan".

Fərqi yoxdur-versən, alsan,

Salam Allah salamıdır.

Coşqun, dünya gör-götürdü,

Kim qazandı, kim itirdi...

Adi söz yox, inci, dürdü-

Salam Allah salamıdır.

“Ədəbiyyat və incəsənət”

(09.09.2025)