İnci Məmmədzadə,

“Ədəbiyyat və incəsənət” portalının Xəbərlər və Təqvim şöbəsi

Bugün 80 yaşını qeydedən məşhur aktrisa barədə danışacağıq. O, Salli Filddir (Sally Field). Amerikalı aktrisa, rejissor və prodüser Hollivudun tanınmışlarındandır və çoxlu mükafatlarla təltif olunubdur. Xüsusilə Norma Rae, Places in the Heart, Steel Magnolias, Mrs. Doubtfire və Forrest Gump filmlərindəki rolları ilə məşhurlaşıb.

 Salli Marqaret Fild 6 noyabr 1946-cı ildə ABŞ-ın Kaliforniya ştatının Pasadena şəhərində anadan olub. Anası Marqaret Fild aktrisa, atası Riçard Drayden Fild isə hərbi qulluqçu və sonradan satıcı olub. Valideynləri Salli hələ kiçik yaşlarında olarkən ayrılıblar. Anası daha sonra aktyor və kaskadyor Cok Mahoni ilə ailə qurub.

Salli uşaqlıq illərindən incəsənətə və aktyorluğa maraq göstərib. Məktəb illərində teatr və səhnə fəaliyyətlərində iştirak edib. Sonralar bu maraq onun peşəkar aktyorluq karyerasının başlanğıcına çevrilib. Salli Fild aktyorluq fəaliyyətinə 1960-cı illərdə başlayıb. İlk böyük uğurunu 1965–1966-cı illərdə yayımlanan Gidget televiziya serialında Frensis Elizabet obrazını canlandırmaqla qazanıb.

Daha sonra 1967–1970-ci illərdə yayımlanan The Flying Nun serialında bacı Bertril obrazı ilə geniş tamaşaçı auditoriyasının rəğbətini qazanıb. 1970-ci illərdə o, komediya janrından daha ciddi dramatik rollara keçməyə çalışıb. Bu dövrdə aktyorluq bacarığını inkişaf etdirmək üçün məşhur aktyorluq müəllimi Li Strasberqin rəhbərliyi altında təhsil alıb.

1976-cı ildə çəkildiyi Sybil televiziya filmindəki ifası onun karyerasında mühüm dönüş nöqtəsi olub. Bu rola görə ilk Primetime Emmy mükafatını qazanıb. 1970-ci illərin sonlarından etibarən Salli Fild Hollivudun aparıcı aktrisalarından birinə çevrilib. Onun ən mühüm filmlərindən biri 1979-cu ildə ekranlara çıxan Norma Rae filmidir.

Burada o, işçilərin hüquqlarını müdafiə edən və fabrikdə həmkarlar ittifaqının yaradılması uğrunda mübarizə aparan Norma Rae obrazını canlandırıb. Bu rol aktrisaya ilk Oskar mükafatını qazandırıb. 1984-cü ildə çəkildiyi Places in the Heart filmində isə Böyük Depressiya dövründə ailəsinin təsərrüfatını qorumağa çalışan dul qadını canlandırıb.

Bu filmə görə ikinci dəfə ən yaxşı aktrisa nominasiyasında Oskar mükafatına layiq görülüb. 1989-cu ildə Steel Magnolias filmində M'Linn İton obrazını canlandırıb. Film ailə münasibətləri, dostluq, ana sevgisi və həyatın çətinliklərindən bəhs edir. 1993-cü ildə Robin Uilyamsla birlikdə Mrs. Doubtfire filmində iştirak edib. Burada Miranda Hillard obrazını canlandırıb.

1994-cü ildə isə Tom Henksin baş rolunda çəkildiyi məşhur Forrest Gump filmində Forrestin anası obrazını yaradıb. Bu rol onun beynəlxalq miqyasda daha da tanınmasına səbəb olub.

Ən məşhur filmləri

Sybil — Sibill

Smokey and the Bandit — Smokey və quldur

Norma Rae — Norma Rey

Absence of Malice — Bəd niyyətin yoxluğu

Places in the Heart — Qəlbdəki məkanlar

Murphy's Romance — Mörfinin məhəbbət macərası

Steel Magnolias — Polad maqnoliyalar

Not Without My Daughter — Qızımsız əsla

Mrs. Doubtfire — Missis Dautfayr

Forrest Gump — Forrest Qamp

Legally Blonde 2 — Qanuni sarışın 2

Lincoln — Linkoln

Salli Fild yalnız kino sahəsində deyil, televiziya sənayesində də böyük uğurlar əldə edib. Onun diqqətəlayiq televiziya işlərindən biri 2006–2011-ci illərdə yayımlanan Brothers & Sisters serialıdır. Burada o, Uoker ailəsinin anası Nora Uoker obrazını canlandırıb. Bu roluna görə 2007-ci ildə Emmy mükafatına layiq görülüb. Digər mühüm televiziya layihələrindən biri ER serialıdır. Burada canlandırdığı obraz da ona Emmy mükafatı qazandırıb.

Salli Fildin uzunmüddətli aktyorluq fəaliyyəti ona çoxsaylı nüfuzlu mükafatlar qazandırıb.

Əsas nailiyyətləri:

- 2 Oskar mükafatı – Norma Rae və Places in the Heart filmlərinə görə.

- 3 Emmy mükafatı – Sybil, ER və Brothers & Sisters layihələrinə görə.

- 2 Qızıl Qlobus mükafatı.

- 1 Ekran Aktyorları Gildiyası mükafatı.

- Kann Film Festivalında ən yaxşı aktrisa mükafatı.

- 2014-cü ildə ABŞ Milli İncəsənət Medalı.

- 2019-cu ildə Kennedi Mərkəzinin fəxri mükafatı.

- 2023-cü ildə Ekran Aktyorları Gildiyasının Həyat Boyu Nailiyyət Mükafatı.

O, həmçinin 2014-cü ildə Hollivud Şöhrət Xiyabanında öz ulduzuna sahib olub.

“Ədəbiyyat və incəsənət”

(06.11.2026)