Azərbaycan teatr sənəti qədim və zəngin tarixə malikdir. Onun inkişafı məsələsi daim aktualdır və qarşımızda mühüm vəzifələr dayanır. Məlum olduğu kimi, “Azərbaycan mədəniyyəti – 2040” Konsepsiyasında teatr sənətinin inkişafı ilə bağlı strateji hədəflər müəyyən edilib. İnanıram ki, həmin hədəflər teatr sahəsində yeni imkanlar yaradacaq.

“Ədəbiyyat və incəsənət” portalı xəbər verir ki, bunu AzərTAC-a açıqlamasında Xalq artisti, aktyor Sabir Məmmədov deyib.

O bildirib ki, teatr canlı sənətdir və daim inkişaf etməlidir, bu inkişaf prosesində gənclərin rolu xüsusilə böyükdür.

“Yeni teatr təşəbbüslərinin, akademik və peşəkar teatrların fəaliyyəti, eləcə də istedadlı aktyorların yaradıcılığı bu sahənin inkişafına mühüm töhfə verir. Opera teatrı, akademik teatrlar və digər səhnə ocaqları da teatr sənətinin təbliğində xüsusi rol oynayır. Əminəm ki, bütün bu proseslər gələcəkdə Azərbaycan teatrının inkişafına daha böyük töhfələr verəcək”, – deyə o vurğulayıb.

“Ədəbiyyat və incəsənət”

(10.03.2026)