Azərbaycan Respublikasının Kino Agentliyinin (ARKİ) Müşahidə Şurasının iclası keçirilib.

“Ədəbiyyat və incəsənət” portalı AzərTAC-a istinadən xəbər verir ki, iclasda Agentliyin fəaliyyəti, strateji hədəfləri və qarşıdakı dövr üçün planlarla bağlı ətraflı təqdimatlar nümayiş etdirilib.

İclasda ARKA-nın mayın 2-dək olan dövr üzrə fəaliyyəti ilə bağlı hesabat təqdim olunub. Hesabatda yerli və beynəlxalq sahədə qurulmuş əməkdaşlıqlar, film layihələrinin dəstəklənməsi və kinematoqrafiya sahəsində həyata keçirilən islahatlarla bağlı görülmüş işlərə yer verilib.

Tədbir çərçivəsində Agentlik tərəfindən növbəti dövr üçün əsas fəaliyyət istiqamətlərini əhatə edən təqdimatlar nümayiş etdirilib. Təqdimatlarda ARKA-nın 2025-ci ilin ikinci yarısı üzrə fəaliyyət planı, rəqəmsallaşma istiqamətində nəzərdə tutulan tədbirlər, 2025-ci ilin maliyyə planı və 2026-cı il üzrə maliyyə proqnozu, həmçinin kino müəssisələrinin birgə fəaliyyət mexanizmləri və buna uyğun olaraq inzibati idarəetmənin təkmilləşdirilməsi haqqında təkliflər təqdim edilib.

Agentliyin gələcək fəaliyyət istiqamətləri və iclasın gündəliyindəki məsələlər barədə ətraflı fikir mübadiləsi aparılıb. Müşahidə Şurası tərəfindən təqdimatlar yüksək qiymətləndirilib, Agentliyin gələcək fəaliyyəti ilə bağlı tövsiyələr verilib.

“Ədəbiyyat və incəsənət”

(03.07.2025)