Azərbaycan Yazıçılar Birliyinin üzvü Coşqun Xəliloğlu bu dəfə “Ədəbiyyat və incəsənət”ə “Yunus Əmrə” adlı şeirini göndərib. 

YUNUS ƏMRƏ

Böyük Türk dünyasının

Aşığı Yunis Əmrə,

Allahın, Peyğəmbərin

Aşiqi Yunus Əmrə.

Zəkasıyla, fəhmiylə

Sözdən nələr yaratdı,

Mahir bir zərgər kimi

İnci, gövhər yaratdı.

Elə bir yol seçdi ki,

Yolu haqq yolu oldu,

Həqiqət zirvəsində

Uludan ulu oldu.

Öyüdü, nəsihəti

Günəş kimi nur saçır,

Müdriklik bağçası tək,

Hər gün təzə gül açır.

Ozan-söz sənətinin

Kamil ustadıdır o,

Hüdudsuz Vətənimin

Əziz övladldır o.

Söylərdi, könül qıran,

Qıldığın, deyil namaz,

Min Kəbə ziyarət et,

Günahların yuyulmaz.

Yüz illərdi bəşərə

Yetirir salamların,

Sovqat kimi paylayır

Təzə-tər kalamların.

İnsanları səsləyir

Saflığa, mərifətə,

Allaha, Peyğəmbərə,

İslama sədaqətə.

Böyük Türk dünyasının

Aşığı Yunus Əmrə,

Allahın, Peyğəmbərin

Aşiqi Yunus Əmrə.

“Ədəbiyyat və incəsənət”

(13.09.2024)