Könül, “Ədəbiyyat və incəsənət”

“Ulduz” aylıq ədəbiyyat dərgisinin yeni sayı oxucularının görüşünə tam yeni tərtibatda gəlib. Belə ki, bu yenilik dərginin üz qabığından, mündəricatından tutmuş son səhifəsinə qədər dizaynında özünü göstərir. 

Fürsətdən istifadə edib dərginin baş redaktoru, Əməkdar jurnalist, şair Qulu Ağsəsdən yeniliklərlə bağlı məlumatlar aldıq. 

Demək, “Ulduz”un yeni dizaynı qardaş Türkiyədə hazırlanıb və növbəti saylar da eyni qaydada tərtib ediləcək. 

Bundan əlavə, jurnalın səhifə sayı da artırılıb. Əvvəl 88 səhifə çap olunduğu halda, bundan sonra 96 səhifəli “Ulduz”u vərəqləmək şansımız olacaq. Qeyd edək ki, iyun sayı xüsusi olaraq 104 səhifə hazırlanıb. Eyni zamanda, jurnalın ölçüsündə də dəyişiklik edilib.

Qulu Ağsəs daha sonra digər bir yeni təşəbbüsün reallaşacağını da bildirdi. Belə ki, Ankarada çap olunan “Gənc ürəklər” dərgisinin baş redaktoru Muhterem Şahinlə Qulu Ağsəsin əldə etdiyi razılığa əsasən, “Ulduz”un növbəti xüsusi buraxılışı “Gənc ürəklər” dərgisində, “Gənc ürəklər” dərgisinin növbəti sayı isə “Ulduz”da oxuculara təqdim olunacaq. 

Bəs dərginin iyun sayında hansı yazılarla tanış ola biləcəyik? 

“Ulduz”un iyun sayı maraqlı bədii mətnlərlə zəngindir. Dərgi Tural Cəfərlinin “Özüylə söhbəti... və şeirləri” ilə açılır.

Sərdar Aminin “Rəsul nəsə demək istəyir”, Təvəkkül Boysunarın “Araz axır qıyğacı”, Ayişə Nəbinin “Relsə bağlanan çoban”, Nazilə Gültacın “İki limon”, “Murad futbola baxırdı”, “Stabilizator”, Mətanət Ulu Şirvanlının “Dikbaş”, İlqar İsmayılzadənin “İtmiş pul” hekayələri, Aydan Abdullayevanın “Darıxan yazı” essesi dərginin bu sayında işıq üzü görüb. Bir müddət əvvəl dünyasını dəyişmiş gənc yazıçı Murad Muradovun “Kərimin ördəkləri” hekayəsi də ruhuna ehtiram əlaməti olaraq cari buraxılışda dərc olunub.

“Ulduz” jurnalı və Azərbaycan Yazıçılar Birliyinin Ədəbiyyat fondunun təşkilatçılığı ilə Vaqif Səmədoğlunun 85 illik yubileyinə həsr olunmuş 35 yaşa qədər gənclər arasında keçirilən şeir müsabiqəsinin qalibləri – Cavid Qasımov, Allahşükür Ağa, Rəşad Nağı Mustafa, Eminquey Akif, El Roman, Seyyidəli Sübhinin şeirləri də iyun sayında çap olunub. Eyni zamanda, Hafiz Hacıxalıl, Aysel Nəsirzadə, Rəsmiyyə Sabir, İnqilab İsaq, Ədalət Salmanın şeirləri “Şer vaxtı”nda oxuculara təqdim olunub.

“Tərcümə saatı”nda Xatirə Nurgülün tərcüməsində Sergey Dovlatovun “Ariel” hekayəsi dərc olunub.

Yazıçı-publisist Nadir Yalçın tanınmış şair Baba Vəziroğlu ilə həmsöhbət olub. “Çalışmışam ki, mahnının mətni həm də normal bir şeirə oxşasın” başlıqlı müsahibədə maraqlı nüanslara toxunulub.

 “Nobel” üzrə ədəbiyyat mükafatları laureatlarından Andre Jidin həyat və yaradıcılığından İlham Abbasovun “Cuhud” soyadlı fransız yazıçısı” adlı məqaləsində bəhs edilib.

“Gənc yazarlar üçün ustad dərsləri”nin növbəti mövzusu “Xorxe Borxesin “Dörd dövrəsi” barədədir. Bakı Dövlət Universitetinin Azərbaycan ədəbiyyatı kafedrasının dosenti Məti Osmanoğlu sözügedən esseni şərh edib.

İyunun “Tribuna”sında filologiya elmləri doktoru Vaqif Yusliflidir. “Yeni ədəbi nəsil” başlıqlı yazısında o, ümumi mənzərəyə nəzər salıb, ikimininci illərin ən gənc nümayəndələrindən bəhs edib.

“Dərgidə kitab”da İlhamə Nasirin qələm nümunələri işıq üzü görüb.

“Dərgidə sərgi”ni Sumqayıt şəhəri 11 nömrəli tam orta məktəbin 5-ci sinif şagirdi Fəridə Cəfərovanın rəsmləri bəzəyib.

Bir sözlə, çox maraqlı dərgidir, oxumağa dəyər.

“Ədəbiyyat və incəsənət”

(02.07.2024)