Könül, “Ədəbiyyat və incəsənət”

Sevimli jurnalımız “Ulduz” bu il ilk qədəmlərini xeyli gec atdı. Bu da ulduzsevərləri xeyli intizarda saxladı. Şükür ki, dalabadal həm yanvar, həm də fevral-mart sayları işıq üzü gördü. 

Budur, jurnalının növbəti sayı artıq əlimdədir. Gəlin onu birgə varaqlayaq. 

Dünya uşaq ədəbiyyatına həsr olunan fevral-mart sayı “Ulduz” jurnalı ilə AMEA Nizami Gəncəvi adına Ədəbiyyat İnstitutunun Uşaq ədəbiyyatı şöbəsinin birgə layihəsi əsasında hazırlanıb.  

Jurnal filologiya elmləri doktoru, dosent, Nizami Gəncəvi adına Ədəbiyyat İnstitutunda Uşaq ədəbiyyatı şöbəsinin müdiri Elnarə Akimovanın “Gecələr səmaya bax, bütün ulduzlar çiçəkləyəcək...” ön sözüylə açılır. 

Cavanşir Yusifli “Eqzüperinin duası” məqaləsini və böyük fransız yazıçısı Antuan Dö Sənt Eqzüperinin dünyaca məşhur  “Balaca şahzadə”sindən üç fəsli təqdim edir.

Hədiyyə Şəfaqət Rey Bredberinin “Zəncirotu şərabı” romanı əsasında yazdığı “Əjdaha şərabı”nı oxucularla bölüşür.

Güneyli ustad şair Səməd Behrənginin “Balaca qara balığ”ı “Ulduz”un bu sayında üzdükcə üzür.

Orxan Aras Jücel Feyzioğlunun uşaq kitabları haqqında “Nağılına sevgi qoşan adam” yazısını təqdim edir.

Əziz Nesin “Abidəsi qoyulan milçək”lə yad edilir.

Jurnalın bu sayında Azər Turan oxucuları “Toğrul Nərimanbəyovun nağıl ağacı, yaxud Teymur Elçinin yaratdığı mifik təsəvvürlər dünyası”na aparır.

Süleyman Sani Axundovun “Əhməd və Məleykə” nağılı, “Klassik uşaq ədəbiyyatından seçmələr” uşaq ədəbiyyatının inciləri kimi təqdim olunur.

Sevinc Nuruqızı ”Uşaq ədəbiyyatında sevgi etirafı” yazısı ilə xoş ovqat yaradır.

Türkiyənin məşhur uşaq yazıçısı Nur Dombaycıyla Cavid Qədirin müsahibəsi uşaq dünyasından söz açır.

Reyhan Yusifqızının “Dünya dəyişdi, bəs uşaq ədəbiyyatı dəyişikliklərə uyğunlaşdımı?”, Mətanət Vahidin “Kitab – xəyal gücü sərhədsiz olan alternativ dünyadır”, filologiya üzrə fəlsəfə doktoru, dosent Aygün Bağırlının “Zəfərin uşaq ədəbiyyatında şöləsi” yazıları, Britaniya və Amerika uşaq şerindən seçmələr, Əhməd Cəmilin “Can nənə, bir nağıl  de” şeiri, Sevinc Elsevərin “Kinomuzda uşaqlar” araşdırma yazısı, Hans Kristian Andersenin həyatı və “Balaca İdanın çiçəkləri” nağılı, Nurlana İşığın “Uşaq məyusluğunun həqiqəti” yazısı jurnalın bu sayında yer alır.

“Dərgidə sərgi”də rənglər dünyasıyla Əzizə və Dəniz Bəhruzlulardır.

Xoş mütaliələr!

“Ədəbiyyat və incəsənət”

(09.04.2024)