“Ədəbiyyat və incəsənət” portalı xəbər verir ki, martın 10-da Sumqayıtdakı Əli Kərim adına Poeziya Klubunun direktoru, Azərbaycan Yazıçılar Birliyi Poeziya sektorunun rəhbəri, tanınmış şair-tərcüməçi İbrahim İlyaslının 60 yaşı tamam olacaq.
Gəl sənə bir yalan uydurum, könül,
Adına aldanıb yaşa da, getsin.
Ən böyük yalanmış doğru deyilən,
Doğruçu olmağı boşla da getsin.
Dosta yalan danış, yara yalan de,
Dağa dərə söylə, quşa ilan de.
Baxıb olmazlara: budu olan, - de,
Oxunu daşlara tuşla da, getsin.
Təpil yarğanlara, çəkil çallara...
Boylan məzə kimi qeylü-qallara.
Çürük matahını bürü şallara,
Bəh-bəhnən alınsın, xoşa da getsin.
Nə gözəl toxunub fələyin toru? -
Adam özü qaçır ağzına doğru.
İçində quldurdu, çölündə oğru,
İçini-çölünü xışla da getsin.
Ömür deyiləni qılıqla, yanla,
Fanidə oyun qur cisimlə, canla.
Bir zaman qapına gerçək yalanla
Qoşamı gəlmişdi? - Qoşa da getsin!
Bu cür fərqli, bənzərsiz misraları yalnız öz dəst-xətti ilə seçilən İbrahim İlyaslıda görürük. Və yubilyarı qarşıdan gələn yubileyi münasibətilə Milli Məclisin Mədəniyyət Komitəsinin sədri Qənirə Paşayeva təbrik edib.
Milli Məclisdə baş tutan görüşdə yubilyar şairin yaradıcı və ictimai fəaliyyətinə yaxından bələd olduğunu bildirən Komitə sədri, onun özəlliklə Türk dünyasında ədəbi əlaqələrə verdiyi töhfələrə, gənc istedadların üzə çıxarılması və onlara qayğı göstərilməsi sahəsindəki xidmətlərinə diqqət çəkib.
Komitə sədri 60 illik yubiley münasibəti ilə İ.İlyaslıya Qarabağ motivli xatirə hədiyyəsi və Komitə adından Təbrik məktubu təqdim edib. Təbrik məktubunda şairin həyat və fəaliyyətinin ən önəmli məqamlarına toxunularaq yazılıb:
“Hörmətli İbrahim müəllim,
Sizi 60 illik yubileyiniz münasibəti ilə ürəkdən təbrik edir, möhkəm can sağlığı, yeni yaradıcılıq uğurları diləyirəm!
Siz Sumqayıtın gənc ədəbi qüvvələrinin 1988-ci ildə yaratdığı və Sumqayıt Şəhər Gənclər Təşkilatının nəzdində fəaliyyət göstərən “Dəniz” Ədəbi Birliyinə sədr seçilmiş və o vaxtdan taleyinizi bu şəhərin ədəbi mühiti ilə bağlamısız.
1990-cı ildə Əli Kərim adına Sumqayıt şəhər Poeziya Klubuna direktor təyin edilmisiz və o vaxtdan indiyədək həmin vəzifədə çalışırsız. 1998-ci ildə Azərbaycan Yazıçılar Birliyinin üzvlüyünə qəbul edilmisiz; “Hamı bir körpüdən keçir” adlı ilk şeirlər kitabınız da həmin il gün üzü görüb.
06 dekabr 1999-cu ildə Azərbaycan istedadlı gənc yazarlarına fərdi təqaüdlərin verilməsi haqqında Azərbaycan Prezidentinin Sərəncamı ilə Prezident təqaüdünə layiq görülmüsüz.
2004-cü ildə “Mən bir söz bilirəm” adlı ikinci şeirlər kitabınız nəşr olunub.
“Yuxuma söykənmiş adam” adlı üçüncü şeirlər kitabınız 2011-ci ildə çıxıb. Həmin kitab Güneyli soydaşlarımızın istəyi ilə 2013-cü ildə transliterasiya edilərək Təbriz şəhərində yerləşən “Haşimi Sudmənd Yayın Evi”ndə də kütləvi tirajla yayınlanıb.
2018-ci ildə mərkəzi qərargahı İstanbulda fəaliyyət göstərən Türk Ədəbiyyatı Vəqfinin Fəxri üzvü seçilmisiz.
2019-cu ildə “Şair olmaq zülümdü” adlı şeirlər kitabınız Azərbaycan Respublikası Mədəniyyət Nazirliyinin təsis etdiyi “Qızıl kəlmə” mükafatına layiq görülüb.
Azərbaycan Prezidentinin 20 noyabr 2019-cu il tarixli Sərəncamı ilə Sumqayıtın sosial-iqtisadi inkişafında xidmətlərinizə görə “Tərəqqi” medalı ilə təltif edilmisiz.
Siz peşəkar tərcüməçi olaraq da çalışırsız. 50-dən çox kitabı dilimizə uyğunlaşdırmısız. Türk dünyasının klassikləri olan Abayın “Seçilmiş əsərləri”ni, Çingiz Aytmatovun “Hekayələr” kitabnı, eləcə də Antuan De Sent Ekzüperi və bir çox başqa Avropa yazarlarının şeir və hekayələrini də Azərbaycan dilinə siz çevirmisiz.
2020-ci ildə klassik və çağdaş Avropa və Asiya yazarlarından etdiyiniz tərcümələrdən ibarət “Qırmızı almadan Qızıl almaya” adlı kitabınız “VEKTOR” Nəşrlər Evində gün üzü görüb.
Sizin elmi, ədəbi-tənqidi məqalələriniz və şeirləriniz ingilis, rus, alman, qazax, qırğız, özbək və bir çox başqa dillərə çevrilib, müvafiq ölkələrdə yayınlanıb.
2011-ci ildən başlayaraq eyni zamanda Türkiyədə, Qazaxstanda, Rusiyada keçirilən simpozium və festivallarda Azərbaycanı layiqincə təmsil edirisz. Türk dünyası yazarları arasında ədəbi əlaqələrin qurulmasında, inkişaf etdirilməsində, o cümlədən ədəbi antologiyaların nəşrə hazırlanmasında xidmətlərinizə görə Dünya Gənc Türk Yazarlar Birliyinin “Üstün xidmət” medalı ilə təltif olunmusuz.
Sizin məktəblilər üçün işlədiyiniz – Mark Tven (“Tom Soyerin macəraları”), Viktor Hüqo (“Paris Notrdam kilsəsi”), Artur Konan Doyl (“İtmiş dünya”), Herbert Uels (“Görünməz adam”), Astrid Lindqren (“Uzuncorab Peppi”) kimi dünya ədəbiyyatı korifeylərinin əsərlərindən ibarət kitablar da oxucular və təhsil işçiləri tərəfindən maraqla qarşılanıb.
AYB-nin 2022-ci ildə keçirilmiş XIII Qurultayı öncəsi poeziya üzrə məruzəçi olmuş, habelə Yazıçıların Qurultayında AYB “Poeziya” seksiyasının rəhbəri vəzifəsinə təsdiq edilmisiz.
Sizi 60 illik yubileyiniz və yaradıcılıq uğurlarınız münasibəti ilə Mədəniyyət Komitəsi adından bir daha təbrik edir, ən xoş diləklərimi yetirirəm”!
İbrahim İlyaslı görüş və təbrikə görə Qənirə Paşayevaya təşəkkür edib. Əlbəttə ki, bu cür qəbullar, yaradıcılığına verilən bu cür dəyər yaradıcı şəxs üçün əsl ilham mənbəyidir.
“Ədəbiyyat və incəsənət”
(06.03.2023)