Portalımızın Poetik qiraət rubrikasında sizə Aysel Xanlarqizinın “Niyə gəldin 40 yaş…” şeirini təqdim edirik. 

Doğum günü insan niyə kədərlənir? Yaş üstə yaş gəldikcə ömür karvanından gedən yük çoxalır, qalan yük azalır, deyilmi? 

Mən 5

hərfdən ibarət 

özüm kimi,

işığı zəif 

bir ad ,

Bu dünyaya doğulan

mənasız bir inad...

Ömürə sınıq 

nərdivan dirəyən,

Gözlərində ölüb

ürəyində doğulan,

özündən küsəyən...

Mən atamın qızı ,

bir şeirin doğulmamış sözü ,

anamın duası ,

qızımın bitib tükənməyən 

ehtiyacı, arzusu ,

Oğlumun anası ,

Kiminsə 

Vəfasızı,

tamamlanmayan

yarımçıq bir 

ailə tablosu...

Əslində kimsəyə 

lazım olmayan,

40 illik 

Səbr kasası boşalmayan.

Bir ürəkdə 

yorulan həsrət nəğməsi, 

tənhalıgın 

tükürpədici səsi,

bir sevgi 

naləsi.

Mən birinin 

ürəyinə köç etmiş ,

nə zamansa 

kimdənsə küsüb getmiş .

Həyatda olduğum üçün 

günahkaram ,

bilirəm,

Üzgünəm, 

Mən 

niyə varam ,

bilmirəm.

Niyə gəldin

40 yaş?!

“Ədəbiyyat və incəsənət”

(15.12.2022)