“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Əlihüseyn Məmmədova həsr edilmiş şeirlə tanış olacaqsınız.
ƏLİHÜSEYN ELŞAD OĞLU MƏMMƏDOV
(24.01.1998.-09.10.2020.)
Bakı şəhərində doğulmuş, əslən Şəkidən olan, Şəki şəhəri 18 nömrəli məktəbin və Azərbaycan Dövlət Neft və Sənaye Universitetinin məzunu, Qarabağın azad edilməsi uğrunda Vətən müharibəsinin şəhidi
Şəhid olduğu yer: Füzuli rayonu
Dəfn yeri: Şəki şəhəri Şəhidlər Xiyabanı
ƏLİ
Hər şəhidin həyatı maraqlı bir kitabdır,
Kitab qiymətli inci, min suala cavabdır,
Şəhid həyatın bilmək həm borcdur, həm savabdır,
Şəhidi ölməz edir, əqidəsi, əməli,
Həmişə ürəklərdə yaşayacaqdır Əli.
Əslən Şəkidən idi, Bakıda doğulmuşdu,
Mayası halallıqdan, düzlükdən yoğrulmuşdu,
Şəkimizi sevmişdi, Bakıya vurulmuşdu,
Sakit, mehriban, dürüst, ağıllı, dərrakəli,
Həmişə ürəklərdə yaşayacaqdır Əli.
Hər günün, hər saatın anlayırdı dəyərin,
Düşünürdü Vətənin gələcəyin, səhərin,
Nə iş görürsə görsün, eşidirdi “Afərin”,
Ailədə qoyulur halallığın təməli,
Həmişə ürəklərdə yaşayacaqdır Əli.
Ağız şirin olarmı “halva-halva” deməklə?
İnsan saflaşır yalnız zəhmət ilə, əməklə,
Kamiliyə yetişir oxuyub öyrənməklə,
Dilində şüar idi, “Yalnız getmək irəli!”,
Həmişə ürəklərdə yaşayacaqdır Əli.
ADNSU-da oxumaq taleyinin qisməti,
Mühəndis olmaq onun saf arzusu,- niyyəti,
Necə də sevinirdi alanda “beş” qiyməti,
Zəhmət çəkən bəhrəsin görəcəkdir, deməli,
Həmişə ürəklərdə yaşayacaqdır Əli.
Deyərdi dostlarına, Qarabağ qan ağlayır,
Vətənimiz ümidin yalnız bizə bağlayır,
Yurd eşqi bulaq kimi ürəklərdə çağlayır,
Qarabağ torpaqları- o bizimdir, əzəli,
Həmişə ürəklərdə yaşayacaqdır Əli.
Yenə səs-səda düşüb yamaclara, dağlara,
Qanlı döyüş başlayıb, afərin qoçaqlara,
Düşmən təlaşa düşüb, bilməyir qaçsın hara,
Namərdlərə yalandan verən yoxdu təsəlli,
Həmişə ürəklərdə yaşayacaqdır Əli.
Qaraxanlı kəndində döyüş çox ağır oldu,
Düşmənin uydurduğu mif yalan nağıl oldu,
Əli elə döyüşdü, millətə oğul oldu,
Xiyabanda balasın qoynuna aldı Şəki,
Həmişə ürəklərdə yaşayacaqdır Əli.
“Ədəbiyyat və incəsənət”
(14.05.2024)