“Ədəbiyyat və incəsənət” portalı Azərbaycan Yazıçılar Birliyinin üzvü Coşqun Xəliloğlunun “Şəhidlər barədə şeirlər” silsiləsini təqdim edir. Bu gün Davud Qurbanova həsr edilmiş şeirlə tanış olacaqsınız.

DAVUD TARYEL OĞLU QURBANOV

(15.02.1996.-03.10.2020.)

Bakı şəhərində doğulmuş, Əslən Qazax rayonunun Birinci Şıxlı kəndindən olan, Binəqədi rayonunun  şəhid  Rizvan  Pirnəzərov adına Biləcəri qəsəbə 299 nömrəli orta məktəbinin və Azərbaycan Dövlət Neft və Sənaye Universitetinin məzunu, Qarabağın azad edilməsi uğrunda Vətən müharibəsinin şəhidi.

Şəhid olduğu yer:  Tərtər rayonu Suqovuşan kəndi.

Dəfn yeri:  Qazax rayonunun Birinci Şıxlı kəndi.

      ÖLMƏZ QƏHRƏMAN DAVUD

Böyük elə böyükdür, heç zaman kiçiləmməz,

Mərdə namərd körpüsü yoxluqdur, keçiləmməz

Yetişməsə sünbüllər zəmilər biçiləmməz,

Hər şeyin öz vədəsi, hər şeyin  zamanı var,

Millətin Davud kimi ölməz qəhrəmanı var.

Davud lap uşaqlıqdan vurğun idi bayrağa,

Qəlbində məhəbbəti tükənməzdi torpağa,

Necə xoşbəxt olardı gedən zaman Qazaxa,

Bu yurd necə gözəldi,  meşəsi, ormanı var,

Millətin Davud kimi ölməz qəhrəmanı var.

Bakıda doğulmuşdu, burda təhsil almışdı,

Uşaqlıqdan mehrini kitablara salmışdı

Neçə- neçə  təşəkkür, tərifnamə almışdı

Hələ də saxlanılan üç fəxri fərmanı var,

Millətin Davud kimi ölməz qəhrəmanı var.

Orta məktəbi Davud əlalarla bitirdi,

ADNSU-ya uğurla, yüsək bal ilə girdi.

Ali məktəb də ona bol-bol sevinc gətirdi

Bu təhsil ocağının şöhrəti var, şanı var,

Millətin Davud kimi ölməz qəhrəmanı var.

Nə qədər arzular var, neçə muraz var qəlbdə,

Yalnız beşlə  oxudu Davud ali məktəbdə,

Çoxuna nümunəydi həm dərsdə, həm ədəbdə,

Hamı görürdü  necə ədəbi-ərkanı var,

Millətin Davud kimi ölməz qəhrəmanı var.

Oxudu həvəs ilə, mükəmməl təhsil aldı

Uğurla o, magistr pilləsinə ucaldı,

Dedi, - Diplom almışam, hərbi xidmətim qaldı,

Hər oğul bir əsgərdi, hər kimdə türk qanı var,

Millətin Davud kimi ölməz qəhrəmanı var.

Əsgər oldu, Vətənə qürurla xidmət etdi,

Ən çətin tapşırığa “Oldu!” deyərərək getdi,

Günlər ötdü, ay keçdi, gözlənilən  vaxt yetdi,

Başladı müharibə, indi hərb meydanı var,

Millətin Davud kimi ölməz qəhrəmanı var.

Gizlədə bilməyirdi yağıya nifrətini,

Düşmənlərə göstərdi əzmini, qeyrətini,

İçib Suqovuşanda  şəhidlik şərbətini,

Fəxr eylədi son anda, can Azərbaycanı var,

Millətin Davud kimi ölməz qəhrəmanı var.

Soysuzlar uydurmuşdu neçə yalan nağıllar,

Elə peşman oldular, elə öldü yağılar,

Heç zaman unudulmaz candan keçən oğullar,

Onların qəlbimizdə əbədi ünvanı var,

Millətin Davud kimi ölməz qəhrəmanı var.

“Ədəbiyyat və incəsənət”

(10.05.2024)